سامحيني...لازمه اچفوفي الوصيّه
سامحيني...مِن وكِت رحتي امْن اِديّه
سامحيني...افْراگچ امبيّن عليّه

مِن شلِت نعشچ يزهره مِن عله امْتُوني
امْن البچي حسّيت ماظَل ماي بعْيُوني
اوگمت اخلّي ايدي اِعله وجهي لا يشوفوني
زينب وخوّان زينب مِن يشبگوني
رايد اخْفي...اوطلعت ابوجهي المُصيبه
رايد اخْفي...يا مُحب يدْفِن حبيبه
سامحيني...افْراگچ امبيّن عليّه

آنه صيّاد السّباع المحّد ايلوحه
گالت الدّنيه عجيبه وصلته اجروحه
صار بيّه المَثَل (شايل بالنّعش روحه)
مدري تابوتچ ابمتني مدري الِمْلوحه
رايح ارجع...لاچن اچفوفي اعله گلبي
رايح ارجع...امْن الحزن ضيٍعت دربي
سامحيني...افْراگچ امبيّن عليّه

آنه طشّيت التُّراب اوطشّت اسنيني
اوبيّنت آثار غُربه ابْرُوحي وابعيني
طاحَت الحنّيّه دمعه ابطرف چفّيني
درت وجهي امن التُّراب اودوّرت ويني؟
ردت اگلّچ...هيّه مو كل فرگه فرگه
ردت أكلچ...الدّنيَه ماظل بيها ملگه
سامحيني...افْراگچ امبيّن عليّه

من بعد عينچ أشوف الدّنيَه مگضيه
ماكو حتّه ابصدري نسمه وحيل ما بيّه
والينام ابگبره يصبح ماكو بي جيّه
اويوگع البيت اعله أهله ابموت راعيّه
وآنه اگولن...راحت الزّهره الحنينه
وآنه اگولن...آنه وافراگج اجينه
سامحيني...افْراگچ امبيّن عليّه

والله مدري اشْلون عايش آنه يالزهره
وآنه دافِن عُمري بيدي والعُمر مَرّه
وادري الِيْفارگ حبيبه ينكسر ظهره
دوّرت روحي اولگيته جرحچ اشكبره
گلبي گلّي...فرگة اُم بيتك ثچيله
گلبي گلي...مايرد خل الخليله
سامحيني...افْراگچ امبيّن عليّه

امنيلي الحيل اعله فگدچ وانتي كل حيلي
وآنه من يوم الدفنتچ ما نمت ليلي
خلّي من تعْب اِلبواچي اجرُوحي تشكيلي
ابْكثر ما أبچي اعله فگدج كلشي يبچيلي
كون اشوفچ...حتّى لو طيف اعله عيني
كون اشوفچ...ابلا كسر ضلعچ تجيني
سامحيني...افْراگچ امبيّن عليّه

امبلّل ابدمع اِشتياقي اوروحي ملهوفه
اومِن كسر فرگاچ بيّه طولي ماشوفه
اوهاي أوّل تالي حيدر فاطمه اتعوفه
واليموت ابّيته غالي تبرد اچفوفه
ذكرياتي...ابعيني وگعن مثِل دمعه
ذكرياتي...طفن كلهن شمعه شمعه
سامحيني...افْراگچ امبيّن عليّه

منترس بيتي ابحَسِرْتي بسّ احس خالي
اوراح مِنّ اعيوني كلشي اوبابچ اگبالي
مشَت مِن بيتي المَحنّه لو مِشَه بالي
اوما بقه ابّيتي اعله حاله كلشي بي غالي
آنه حيدر...اجبال أعْدِل كون هالَت
آنه حيدر...هسّه ليش اچتافي مالَت
سامحيني...افْراگچ امبيّن عليّه