للتاريخ .. اذكر هالقضية
للتاريخ .. مهضومه الزجية
بلغوا بيها الطاغية
ماتت ومو راضية
للتاريخ

كلمة للتاريخ اكتبها اعله بابي...شاهد اعليها الضلع وابني وحجابي
وبسبب كلمة وإن موتي وعذابي...والـ لفظها ناصبي لا مو صحابي
والاحباب .. تشعر بالهضيمة
والاحباب .. تكشفها الجريمة
گولوا امنا الغالية...ماتت ومو راضية
للتاريخ

منهي گبلي لقبوها أم ابيها...منهي گبلي العالي زوجها العليها
ماكو مثلي تصمت الدنيه الحجيها...ورحمة الله تنزل برفعة اديها
بس يا حيف .. فرحتهم ونيني
بس يا حيف .. سطروني اعله عيني
اكتب ابكل زاوية...ماتت و مو راضية
للتاريخ

انا للعالم وطن و اخلافي غربه...و احنه ذي القربى وانه للقربه قربه
اني روح الهادي طه واني قلبه...فاطمة الـ آذاني يعني آذه ربه
وين يروح .. من الله السطرني
وين يروح .. عالحايط عصرني
يصلى نار الحامية...ماتت و مو راضية
للتاريخ

اني حورية علي وانسية اني...اختلف عن النسه ابكل المعاني
افتح ابواب السمه واني ابمكاني...سيده انه بزماني ومو زماني
والملعون .. شال ايده عليّه
والملعون .. راد لي المنيّه
بت محمد ها هيّة...ماتت و مو راضية
للتاريخ

هاذي أرضي والسمه أيضاً سمائي...والله ما يرضه أبد الا برضائي
اني نور الما طفه بعاصف بلائي...حتى قنديل العرش يضوي ابضيائي
ما مسموح .. ثانيهم يجيني
ما مسموح .. ينطق سامحيني
هالعبارة باقية...ماتت و مو راضية
للتاريخ

اني بالعصرة طحت و اغمه عليّه...و اسمعت كلمة خيام و غاضريه
گعدتني زينب و لزمت اديه...ما شفت زينب شفت حرمة سبيه
من هاليوم .. حزنج يمه يبدي
من هاليوم .. للطف استعدي
صيحي و انتي باكية...ماتت و مو راضية
للتاريخ

شابت ارموش الأرض من عبروا الحد...والكسر ضلعي غداً يذبح محمد
هذا دخان الذي من اخيمنه يصعد...و السياط الـ بالسبي من سطرة الخد
عالتربان .. مطروحه الغياره
عالتربان .. ما تغفه اليساره
بهالمصيبة الدامية...ماتت و مو راضية
للتاريخ

ابكسرة ضلوعي شفت صورة عساكر...تهجم اعله اخيمكم وماكو مناصر
جسم ابو اليمه ايتطشر بالحوافر...و تتجه للمشرعة اعيون الحراير
للعباس .. عينج يالأسيرة
للعباس .. دمعاتج جبيرة
گولي و انتي ضاميه...ماتت و مو راضية
للتاريخ