اشبيها امي و ليش متغيّر وضعها...من اريد احضنها ليش اتضم ضلعها

جنت من اگبل عليها تضمني بجفوف الحنان
من اشم ريحة حضنها احمد الله اعله الأمان
من الصبح للصبح تبجي و حفظ ونتها المكان
كسر خاطرها و ضلعها الله و اكبر عالزمان
تدير من عندي الوجه لو گابلتها...و تبجي اذا عن لون البخدها اسألتها
خايف الجم خدها اذا امسح دمعها

قصد عندي و ما اسأله عن وضع خدها الجريح
خاف اذا تحجيلي همها طيحة المحسن اطيح
بس على الباب ارد اناشد ليش تنظرله و تصيح
و تفز جن فزة حمامه من تحرك الباب ريح
لون دگ الباب تركض تلزم ايدي...تگول لا يا باب لا تاخذ وليدي
تعتب اعله الباب و الجف الدفعها

هذا يا ضيم العله امي الوصلاها ال هيج حال
ضعفت الحد ما شفتها ما يبين لها خيال
شكد اريد اسألها و اسكت خاف يلجمها السؤال
والله مشتاگ الحضنها الجنت بي اشبع دلال
الله لا ينطي الباگ البسمة منها...هسه انه و زينب بعازة حضنها
الجانت تضوي النا طفوا شمعها

امي يا رحلة حياتي التزدحم بالذكريات
والله يرتاح بمماته كل بشر قبل امه مات
واليفارگ طيبة امه تزغر ابعينه الحياة
شلون اغمض عيني و اغفه و بالگبر امي تبات
بعد ما ثق بالزمان الخذها مني...و اظل حد طف كربله ما عوف وني
اليمه بغيابج بعد محد سمعها

شما اسولف عالزجيه تخجل حروف الكلام
امي ماتصلي الوحدها ايصلي وياها الحمام
بالحرب من تدعي امي تترس العالم سلام
سنبلة و محنية فوگي شكثر سهرت حتى انام
علة التكوين ما عرفوا قدرها...زهرة الله انگطعت و ذبحوا عطرها
و صفع عرش الله بجفوفه اللي صفعها

مثل لون ثياب حزنج صفت كل ايامي سود
ما تعود ايامي تضحك الا عافيتج تعود
ليش جفج گاد ضلعج ردته لجفوفي يگود
فوگ خدج اثر طالع يشبه اثار السجود
يا ربيع الله شعجب ذابل خضارج...نارهم خطار و اتعزبلها دارج
جايعه النيران بس بابج شبعها

يا سلام الله اعله ونها و عالدموع ال بالعيون
تهون كل الدينا عندي بس دمعها الما يهون
باجر تسولف الجدي عاليوافي و عاليخون
و عالتمّسك بالوصية و عالغدر بالأقربون
سوليفله اعله الوصي جتفوا يمينه...و بابه التحبه بحطبهم دافنينه
يا رسول الله البشر تبعت طمعها