خيمة الحب و الوفه و العاطفه...وشمعة حياتي
انتي ميته لو آنه...ظهري انحنه...وحانت وفاتي
قلبي ما شال المصبيه...شايل جنازة حبيبه

حيدره العندي الحرب ماتسوه شعره...مو هذاك المايرد سيفي امن اشهره
اتراجفت كلي على اوداعج يزهره...الموت مو خيبر تره واكدر اكسره
والهجر مو ابن ود خاطر اشطره...شايلج مدري شلت عمري اعله كبره
الجانت الروحي ولف...فوك الجتف...شايل نعشها
والاميره اعله النسه...حقها أنسه...وهدمو عرشها
انحسبت احساب الغريبه...قلبي ما شال المصيبه

ارتجز وكت الحرب واحجي الاريده...وسيفي مثل إحجايتي هم ما اعيده
الفارس اليشرد جنت بالخزرة اصيده...مو على بالي هذن و انتي بعيده
حالي حال الينذبح كدامه عيده...من شفت باب الملك دفعوه عبيده
حرقوا الباب و شفت...و اتعذبت...بس مو بديه
عاتب السيف الغمد...شو ما ترد...قتله الوصيه
حالتي والله عجيبه...قلبي ما شال المصيبه

يا قلب حيدر علي قلبج مكاني...غسلت روحي لمن غسلتج اني
لو يمد ايده و يجس نبضي زماني...ميت بدونج و لا عايش لكاني
عمرج بطول النده و موتج ثواني...ما اغطيج بجفن كون بحناني
و القدر حكمه انفرض...بس النبض...حافظ وعدنه
قلبي وي قلبج يدق...شوق و عشق...مهما بعدنه
يا عشق عمري و نصيبه...قلبي ما شال المصيبه

داخل بجم معركة موت و خضتها...اهزم بسيفي دول لو نازلتها
لاجن فراقج حرب ما جربتها...دنقت بيها و شفت مرها و عشتها
جنازتج دنيه و على اجتافي شلتها...و شيّعت معنى الفرح من شيعتها
ينزل بخدي الدمع...يشرح وضع...حالي برحيلج
انتي شلتيني عشق...آني صدق...بجنازة اشيلج
الطيبة اليجازيها طيبه...قلبي ما شال المصيبه

احفر بلحدج و اسولفلج عليّه...مو علي جني و علي حامي الحميه
و لا هذاك اللي شمس ردّت اليّه...الجنت صاكرهم صكر هجموا عليّه
و كسروا اجناحي بكسر ضلع الزجيه...و الفقار مجتف بحبل الوصية
سمعوا اموصي النبي...وأهل العبي...شافوا حجابج
والله لو مسموح الي...وداعت علي...شيحرقه بابج
بيهم آني اطفي لهيبه...قلبي ما شال المصيبه

و ارجعت ونة محب مجروحه ونته...بلايه قلبي و القلب يمج دفنته
و دمج الـ عالباب انه بدمعي غسلته...و المكان البي عطر منج حضنته
و زينب اقبالي جرت دمعتها سكته...ما بقه قالت بعد بس الله و انته
طاحت الخيمة و بعد...ما ظل احد...واتقله يمه
اليلبس ثياب اليتسم...بي ينلجم...وجرحه شيلمه
و شيلم دمع المصيبه...قلبي ما شال المصيبه

يا دلالي و هيبتي و زهرة زمانج...ماليه البيت بدفو بطيبة و امانج
جانت الجنة تجي و تغفه بجنانج...والحسن وحسين اجوا شافوا مكانج
دوروا بي ما لقوا ريحة حنانج...كلمة الـ يمه شكثر حلوة بلسانج
حضنج احلى امن الوطن...مو للزمن...ينقط محنه
و اسمج الغالي انكتب...نور و ذهب...وحروفه جنه
رحتي و الراح شيجيبه...قلبي ما شال المصيبه