[ لواء النصر في الطف يتركّز ]
يوم ثاني ابشهر عاشور شبل عقد الوله...صبح لاچن ابلوه الدين احسين ابكربله
هتف بصحابه الصناديد شبل فحل الرجال...دونكم هالدار حطّوا بيها يكرام الرحال
نزل بيها ابجانب احسين اوجانب للنزال...او گبلته الحر الرياحي او لأبن حيدر نازله
حين طب للغاضريّه ابن النبي اوريحانته...واهل بيته اويا الانصار والاكرام اخوته
سلّم اعله الدار والدار يصاحب حيّته...نادته ياهله اوحيّاك اوياحي اوهله
يا عزيز الله يالحسين يبن ذاك الندب...اسأل الركبان عنّك ليك لازال ارتجب
حيث واعدني الباري بيك بطروس الكتب...گالّي ابتربتچ لحسين هديّه منّي اله
اومن يراني الله الها اليوم ملايكة السبع...تنزل الوادي اوما زال جمع يتبع جمع
والرسل يتكاصدوني ابنوح وبجري الدمع...والوحش والطير والجن تون بأرضي اومعوله
اوما ابهذا السبب والسر خابره اوعندي علم...غير انّي بيك أدري تصل وبداري تتم
هلّك اتسولفلي يحسين يحر اوياشهم...بالمصيبه التسدر اعليك يبن سيد المله
جاوب الدار النزلها ابن الفحل حامي الجار...يتضحلچ يوم عاشر ما علي يسدي يدار
يوم ثامن عسكر الشوم على احسين استدار...مثل دور العين بالبر بالمغاوير انمله
ناده أصحابه اوجمعها نهض وعليهم خطب...خطبة المبعوث جدّه اعله امّته واعله العرب
ما يگومي ابصحبتي اليوم سوه المر والعطب...ما عليكم حرج منّي كلمن ايرد الهله
وآنه الهالناس مطلوب اومگصدهم دماي...انچان تردون السلامه ابد تلگوها معاي
مدّوا يصحابي يطيبين اوخلّوني وعداي...لا ابواسطتي يعمكم ظيم واعدام اوبله
بايعيتوني يگومي صدگ والبيعه صفه...اوذمم بيعتكم عليكم والذمم حق تنوفه
لاچن اعليكم امحتمه وآنه سبط المصطفه...والمعين الله والاقدار ابلوحه امسجّله
حين سمعت خطبة احسين عمامه والاصحاب...هاجت اومن عدها العيون تهل هل السحاب
جاوبوه الكل يعزنه يبن دحّاي الابواب...تعز انفسنه اعله نفسك نمد عنّك بالفله
لا وحگ جدّك الرحمه ما نخلّيك اوحدك...حتّه ما دونك يالحسين الكل منّه ايهلك
من علينه الله ابنعمتك ياحسين اوجيّتك...وبحماك اوحدر يدّك وبجوارك عايله
