[ موشح للرضيع (ع) ]
هوّن اعله احسين دهره امصابه...حين عبد الله السهم من صابه
صاغ المحتّم لابن زاچي النسب...طوگ لامن فضّه لامن ذهب
لچن نشّابه انمزجت بالعطب...اوحلّه جيد الطفل بالنشّابه
سيّدي طفلك يضيغم يمغوار...واحد امن اعوانك اومن الانصار
صاح لبيّك اولعد نصرتك ثار...افرح اوگر ناظرك يايابه
بين اياديّك رضيعك منحمل...للمعاره اطبع بكتابه المثل
دوه العسكر من حرب هذا الطفل...ليث ومعيّر نفج من غابه
صاحت الصوبين عسكرها جميع...يبن بالمحشر فلا غيره شفيع
للمعاره ليه جبت هذا الرضيع...من ثدايه امّه اومن اطنابه
گال ياشيعة بني حرب اوصخر...ما لفيت ابهالطفل ليكم بطر
لاچن امن العطش دلاّله انفطر...اوجف حليب امّه اويبس محلابه
الطفل ينذال يفراد الظلم...تعطف اعليه الگلوب اینرحم
حيث ما يجرم ولا عامل جرم...امن الولم يضجر ولا يدرابه
ابهالطفل تدرون ياهالظالمين...اليامجد ينتسب من العالمين
مهجه للهادي او چبد لام الحسين...اوللوصي ريحانه اوسلوابه
اوتمرغ ابماي العذب بيها الفَساد...عدل وحشيّه اوخنازير السواد
اوتمنعونه اعله الغطارف والامجاد...اسواد وجه ایزيدكم وحزابه
اوما يحرمون الورد گوم اعله گوم...جرت ما بيناتها اسيول الدموم
چیف ابن يضعة المختار امحروم...من زلال الماي ومن اشرابه
صاح من شاف الطفل ذاك الجمع...الناس يظمون الاطفال ابيا شرع
ناده ياحرمله الفاجر واللّكع...دوك جد اعله الطفل بذهابه
آه لوما یعصر الزهره الرذل...اومن حشاها یگع عالگاع الحمل
مايويلي انذبح عبد الله الطفل...اسود ابدمّه بياض اثيابه
آه يالمحجوب عن كل العيون...ذبح عبد الله اعله دلاّلك يهون
والله يبن الحسن من تجلب الكون...اومايهمّك من تريد اگلابه
ایساوي اظفر امن اظفار الرضيع...العوض ورد الماي روّوه النجيع
لو بعض مابيك بِالعرش الوسيع...ضجر الله اوضاگ صدر ارحابه
حتّه ليمته تصل ياسيّدي...تحلم اعله اجنوده تيماه اوعدي
تظن ياتي عصر بالدنيه ردي...ارده من هذا العصر واصحابه
