[ موشح لحامل لواء الحسين العباس (ع) ]
تصرخ الرايه اعله فگد ايمينها...من وگع عبّاس تنخه احسينها
يعبّاس اعليك تنحب رايتك...من يزمها غيرك ابيوم الظنك
عودها اتكوّن ابباطن راحتك...اشلون رايه اللّي منك تكوينها
من يبو فاضل ابرمحه اوبيرغه...مثلك امسلط ابحومات الوغه
ما تجدّم ليك من بالغي طغه...الاّ سيفك ضيّفه ابسچيّنها
من يبو فاضل ملك مثلك فضل...شمل ما بالكون حب الكم وصل
فرع يانع طيب من ذاك الاصل...حيدر النوّر الدنيه ابدينها
من يبو فاضل ملك مثلك شرف...كفو اوشبل المرتضه نعم الخلف
دارك الفردوس اعلاها الغرف...مسكنك وحظيت بحسن عِينها
من يبو فاضل ملك شلك فخر...لا ولا بالكون وربيعه اومضر
وغدروا بيك اوعلى الغبره وذر...واختلس مهجتك منها اونينها
صفگ اید ابأيد ودموعه جرت...اوگال هاليوم الخصم بيّه شمت
يعبّاس اگلوب عدواني اشتفت...والچفوف الفگدك امحنّيها
بيتي يابا الفضل هاليوم انهجم...اوطود صبري اعليك ثلثنه انهدم
اوعمري بالدنيه بعد وجهك عدم...ابعدت زیني اورمتني ابشينها
ما هجس گلبي ابحر سهم المصاب...حتّه من شفتك طريح اعله التراب
ياضوه عيني اوبدر بيتي الغاب...عدمت اعليك النظر جفنينها
فگدك ارماني ابلهوات التلف...اومفرد ادعاني ابهالسبعين الف
یاوسافه اعليك لو يجدي الوسف...اوعيّت اعليك النفس تهوينها
گام لاچن من اخوه اشلون گام...ظهره وهلال السمه اوگوس السهام
يخط جدمه الگاع وانوه اعله الخيام...الفت ليه تتصارخ انساوينها
والمصيبه اتلگتّه اسكينه ابونين...تبچي وتنادي يبويه ياحسين
عمّي ابو فاضل دگلّي غاب وين...بالميّه واعد اوچاوينها
من سمع مدلولته اسكينه سكت...لاچن العبره ابصدره اتكسّرت
عمّچ اتگنطر اوشح بيه البخت...اوبالمواضي جثّته امفصلينها
شبچت العشره اسكينه على الراس...لـمّن اخبرها مرد منها الحواس
ردّت اتنادي يعمّي يعبّاس...ریت عگبك ينجلب عصرينها
