بیچ ياساحة الكوفه اتشيّد المسلم گبر...شمس يزهو ابجبهته الدين اوللمله بدر

لون ما يلكوفه مسلم گبره بثراچ انرسم...دون شبهه وشك اصبح شان وجدانچ عدم
لاچن اتنوّه الهالدین علی رغم الصنم...علم للتايه يدلّه امن الغوايه والكفر

يا ثرى الكوفه ابضمانك للعله والعز جسم...ساحه يتمنّه السابع بيك وافلاك النجم
كل وكت ياگبر مسلم بيك الأملاك اتخدم...بالخدامه اتباهي الافلاك عليهن تفتخر

لاچن اسأل يهالكوفه من محاريج بعض...ما جره اوصار اعله مسلم من أيادي اهل البغض
گلّي بالكوفه غصب مال هتك ذمّه اوعرض...عمل ويّه الناس منكر لوجِنَه سایه اووزر

جاوبتني الكوفه لاچن الجواب السان حال...دونك اصغيلي يناعي يمن دمعك حمر سال
اثمنطعش الف اویه مسلم بايعوه امن النذال...صبح لاچن اغدروا بيه اوخانوه العصر

اوطلع من هالمسجد البيه اتنوح اعله المصاب...ذاهب اومايدري لاوين سلك بيه الذهاب
حتّه جابنّه اجدامه الدار والعتبة الباب...وگف چالمسكين مسلم حاير ايدير الفكر

طلعت امن الدار شافت شخص من عنده اوربت...نادته آمر يراشد سمع لاچنّه سكت
نادته النوبه ابحرگه جاوب اوليها التفت...ضامي ابغي الماي والماي الموروده الاجر

حيّت اوسارعت للدار اوجابتله النمير...شرب لاچن ظل يصاحب واجف ابعينه يدير
نادته جد اعله منواك ابحفظ الله اوسير...والهلك دونك يلاجي خير واگطع وانحدر

سمع لاچن فاض دمعه ابغير وَن اولا نحيب...اوگال مالي من عشيره وأهل بالكوفه اوصحيب
لچن مطلوب اعله دمّي وآنه يالحرّه غريب...هلّج ابمعروف ورجه ايكون مجزاچ الحشر

نادته من يا عشيره اوكسر خاطرها اوبچت...گال مسلم وآنه الناس الكل بيّه اغدرت
نادته دونك المنزل حيّت اوبيه ابشرت...ما دره ابهالبيت مسلم بي يموت اوينغدر

عرضت العيش اعله مسلم عيّه ايضوگ العشه...اوتلتهب نيران وجده الحدر ضلعه او بالحشه
بين ما يخشه امن الله اولا من الناس ایخشه...اويركع اويسجد الباريّه اوحمر دمعه يدر

طب ابنها الساحة الدار على افراشه انضجع...هجس من امّه وحيفه اولفظ من عدها سمع
نشد منها اومنّه اخذت عهد وبسرها اطلّع...واختبر مسلم ابداره ريت بي لا يختبر

گام من وكته الميشوم للأشعث واعلمه...اخبره ابمسلم الفاجر نغل مرجانه الامه
واخلع اعله الولد خلعه امن الملابس واكرمه...اوطوّگه الطاغوت لاچن طوگ صافي امن التبر

بین ما ياويل مسلم يرتجب وجه الصباح...لن صهيل الخيل عالدار بده صفگ الرماح
طلع لاچن طلعت الموت على قبض الرواح...ليث طاوي امعيّر اوهاج او بالكون ايهدر

عگب ما خلّه الكوفه بالحمر طوفان نوح...اوياخذ الفُرَّس اويرمي اجسومها فوگ السطوح
لمحته اعيون الشهاده نادته الجنتك تروح...جابته الگصر الاماره اوگنطروه امن الگصر