(حفيد حيدر)
ليله هلهلت واتصيح وين الخيل منواها...ابني الما يهاب الموت سل سيفه اوتعناها
طب للكون المصيت أوگام ایجول بالملعب...نوبه ایلعب الرایه اونوبه ايهز المذهب
گام ایخز مساميها اویلگط وين المذرَّب
عرگل كل هذيچ الخيل ...ونشبها الرهگ والويل...سوه انهارها چالليل
اوعج الخيل بالميدان عين الشمس غطاها
ساعه ايصول عالیمنه او ساعه اعلى اليسار ايصول...اوملچ الموت يبراله اشما يامر عليه ويگول
ظنت كل هذيچ الگوم (حیدر) بالطفوف ایجول
كل سربه اليخزها اتگوم...اوغوجه اعلى الصفوف ايحوم...صاحت كل هذيچ الگوم
غير المفر ما إِلنه اولفت كل رواياها
ناداها المفر لاوین من سيفي يخوانه...لاچن من عطش چبده يلوج اویابس السانه
ما باله ابكتايبها اوطفحها اعلى عدوانه
يصيح آنه الفحل جدي...شوفو اعليكم اشيسدي...يويلي غافله العبدي
بالمرهف طبر راسه اوهاشم فگدت الواها
رد ذاك الفزع کله اوصار الهم هظل واصياح...اوداروا ویل گلبي اعليه بسيوف اونبل وارماح
لمن فصلوا جسمه اوظريبه اعلى الوطيه طاح
شابح للخيم بالعين...اوراسه منجسم نصين...گام ايصيح بویه احسين
تراني اوگعت بالحومه اوصرت ابولية اعداها
سمع صوته اوصفگ بیده اوغابت مهجته عنه...ثلث مرات گام اوطاح لاچن يجذب الونه
سمعت صيحته العيله اوصارت بالخيم حنه
راح ایسكِّت النسوان...اوتعنه الحومة الميدان...شافه اموسد التربان
گعد يم راس مدلوله اوعينه ايسيل مجراها
ایگله يا علي يبني يالتشبه لعد جدك...عمري بعد ما ريده (على الدنيه العفه بعدك)
يا هو اللي طبر راسك اوعفَّر بالترب خدك ؟
اويلي اعليك يولیدي...رحت یاسلوتي امن ايدي...اولویت اعلى الهظم جیدي
اوفگدك يا صبي العين خمد عيني اضواها
ببني ياعزيز الروح اويلاياعلي يبني...فگدك نحل اعضامي اوهد حيلي اوبیَّدني
أشلون ابين عدواني تخليني اوتفارگني
وانته السيف والرایه...اوحامي الخيم والثایه...وانته بيك الكفایه
هاي (امك) يماي العين منك تطلب ارباها
امك يا علي يبني تريد اتطالبك برباك...تخليها غریبه اشلون يبني ابين هاي اعداك ؟
انته اتوزمت بيها اوجبتها من المدينه اوياك
ليش اتعوفها ابها الحال...غریبه ابين جمع انذال...الك برض الطفوف اعيال
غيرك من عگب عينك ياهو البعد يحماها
يبني (عمتك) زینب من عدها الگلب فرفر...تعنت ليك للحومه يبویه تنهض اوتعثر
تصيح ابصوتها يحسين دليني ابعلي الاكبر
إنهض يا علي ليها...يبني او أمن اعليه...واعلى الضيم سليها
تراهی موچبه اوتنخاك ما تنهض النخواها
