ما دارت رحات الكون بالحومه اوغدت تفتر...إله من حمل عالگوم وتوسطهم (الاكبر)

لاح ابظهر المطهم واتعنه لبوه احسين...منه يطلب الرخصه ويصوِّل على الصوبين
لمن شاف مدلوله دمعه سال عالخدين
رفع للباري اچفوفه...اوصاح ابروح ملهوفه...يربي اشهد على الكوفه
برز شبلي لهاليها اوناري اعليه غدت تسعر

لمن حصل الرخصه نزل لحسين حب ایده...وابوالیمه سچب دمعه اوگام ایودع اوليده
يگله من تفارجني يبويه العمر ما ريده
شلي بالعمر بعدك...يالتشبه لعد جدك...أثَّر بالگلب وجدك
اونوحي اعليك ما يبطل يا مدلول للمحشر

يبني رحت يم (امك) يالأكبر تودعها...تنوح اوتون بالخیمه یبویه اعليك أسمعها
يروحي ما تصل ليها بلچن يشف مدمعها
ما تگدر تصل يمك...بیَّد حيلها همك...يبویه اشحال گلب امك
لو شافتك بالحومه اوجسمك عالثره امطبر

شد عالخيل المصيت اوسل سيفه اوکسر غمده...اوگام الفحل يتچنه ببوه احسين وبجده
صاح ابصوت ثجلوهن عليكم بعدت الرده
لكدها اوعالحزم ذبها...اونيران الحرب شبها...ذیچ السرب عگبها
اوصول على الملزومه اویبره السيفه المگدر

گام ایجول بسربها اوسيفه ابروسها يحصد...گالوا وين منجانه من سیف الطبر (بن ود)
لفت کل رواياها اوللكوفه نوت تشرد
غوجه اعلى السرب خطم...اوسيفه الشوسها خذم...عليها الكون كله اظلم
لاچن خطة الميدان من نوره غدت تزهر

لعب بيهم شبل حیدر اومن عدهم أخذ حيفه...اوگام ایجول بالحومه اوبیها ايخذم ابكيفه
يويلي غافله (العبدي) اوصوَّب راسه ابسيفه
علیه دارت الخوانه...وهو شابگ على احصانه...ما عافوه عدوانه
لمن وگع بالحومه اوجسمه اعلى الثره اموذر

نده يحسين ليَّه اسرع وابو اليمه تعناله...شافه اعلى الأرض مرمي لاچنه ابيا حاله
ذب روحه على اوليده اومنه العين هماله
صاح اودمع عينه جره...نايم يالأكبر عالثره...اوجثتك يبويه اموذره

اویلا يا علي يبني يالتشبه لعد جدي...فگدك نحل اعضامي يوليدي اومرد چبدي
عگبك ما بگتلي روح يبني اولا گلب عندي
یا شبه جدي المصطفه...نورك يبويه امن انطفه...عگبك على الدنيه العفه

شالوه اخوته اوجابوه يا ويلي للمخيم...حطه ابين عماته اوشافن حال المشيم
گامن كلهن اینوحن اوصبغن روسهن بالدم
ليلة تنادي يا علي...عگبك بگیت ابلا ولي...يوليدي ريت الموت الي
ساعه اوظل ابوك اوحيد واعليه الفزع يفتر