من هاشم شبل معلوم لاح ابظهر الخياله...طب الخطة الحومه اوگلب احسين يبراله

لمن حصل (الرخصة) اولاح ابظهر الكحيله...گام ابن الفحل يحدي اوتهلهل بالخيم ليله
شد اعلى الحرب مغضب اوعين احسین تربیله
گام ایجول بالملعب...اوبیده ایهز المذهب...الحربي ايصيح من یگرب؟
تسمع كل هذیچ الگوم ماواحد تدناله

لمن شافت أهل الخيل طاعون الزلم مجبل...هايج من المخيم عليهم هيجة المشبل
نسبت کل مساميها والعسكر گبع بالذل
گالوا وین منوانه...والمگدر تولانه...صفت نية الخوانه
تلف راياتها اوتشرد من مرهفه اوعساله

لمن عرف نیت الگوم من سيفه نوت تشرد...اولفت كل رواياها اوللكوفه ترید اترد
لكدها اوخطم اعليها اوگام ابروسها يحصد
يخذم بيهم ابكيفه...اومن عدهم أخذ حيفه...چسب نوماسها ابسيفه
اوگام ابخطة الميدان غوجه ایجول (بخياله)

طلعله (بکر بن غانم) اوشد اعليه (علي الاكبر)...لاچن وجه ابوه احسين لونه انخطف وتغير
طلعت صارخه (ليله) تگوم اوعالوجه تعثر
تگله انصاب المدلل...و اشوفن لونك اتبدل...يگلها اعلى ابنچ اموجل
طلعله امن العرب فارس تشهد دوم بفعاله

يليله الخيمتچ ردي وادعيله ابدمع مسچوب...طبت لعد خيمتها او على ابنيها گلبها ایلوب
يا من سدِّرت (یوسف) من سجنه لعد یعگوب
يا معبود رد ابني...منه لا تخيبني...يلاهي تعلم ابحزني
ما عندي ولد غيره واريد ادلل ابجاله

استجاب الله دعه (ليله) اوجندل بكر بن غانم...جاب الراس بيمينه اوعَّود للخيم باسم
تگله احسين مدلوله اودمعه امن الفرح ساجم
يشمه اولیه يتفكر...یگله والگلب مستر...لمك روح يالاكبر
عليك اموجله يبني اومنها العين هماله

اريدن جایزه ایگله منك (شربة اميه)...بعد ماشوف بعيوني يبویه لحگ اعليه
يگله امنين اجيب الماي وتتلهف على ابنیه
حچيك مرد دلالي...يلكبر واشدهت بالي...رد للحرب يالغالي
اوجدك لابد ایرويك من العذب وازلاله

سدر مهظوم للحومه يصيح آنه الفحل جدي...گام ابشوسها ايخذم وبفرسانها يردي
يویلي اعليه من صابه اعلى راسه ابمرهفه العبدي
والراس انجسم نصين...اوعليه التمت الصوبين...طاح اوصاح بویه احسين
عدواني تولوني اوللحومه تعناله

من شاف العزیز احسين مرمي اعلى الثره او مطروح...ذب روحه على اوليده اوشاف الراس دمه ایفوح
صاح العمر ما ريده يبني اوشلي ابها الروح
یا شبه جدي المصطفه...يوليدي اديت الوفه...عگبك على الدنيه العفه

شالوه اخوته اوحابوه يا ویلي للمخيم...تلگنه الحرم كلهن اوشافن حال المشيم
صارن عالجسم داره اوصبغن روسهن بالدم
ليله تنادي يا علي...عگبك بگیت ابلا ولي...وتحيرت يمدللي
يا (أم) فگدت ابنيها او راحت ویه چتاله ؟