الحسين يودع مدينة جده قاصدا کربلا
ودع وطن طیبه احسين والكربلا اتعناها...اوحفت بالظعن عدنان واتعنت مناياها
یثرب حين ودعها اوعنها الظعن راد ایشیل...اوهاشم سمعت ابنیته ناوي اعلى المسير ابلیل
لفاه (امحمد) اینادي او دمعه اعلى الخدود ایسیل
ناوي ابهالظعن لاوین...ماخذ كل هلك يحسين...لا تظعن ينور العين
(يثرب) ما تود فرگاك ليش اتريد فرگاها
ليش ابضعنك ابها الليل طالع من وطن جدك...يظلم من عگب عينك (اوهاشم) تذل من بعدك
انچان الگصد للكوفه اترك یا فحل گصدك
لا تظعن الواديها...تخونك بس تصل ليها...يخويه انسیت اهاليها
بخوك اشسوت اوعودك او تدري ابكل سجاياها
لمن سمع حچیه احسين ون اوصفگ اید ابأید...يگله الگوم يردوني ابايعهم واطیع ایزید
واگضي العمر بالذله يخوي الها العمر مارید
خليني ارشد ابنيتي...وآخذ كل اهل بيتي...بالعز راید امنیتي
علیل الدین يمحمد اودمي العلته ادواها
صاح ارشد يحادي اوسير وتجدم على اظعوني...هیهات اصبر اعلى الظيم وعليه نغمض اعيوني
لن صوت العليله اتصيح يهل الظعن تانوني
يهلي اویاکم اخذوني...علیکم یعمن اعيوني...وحدي لا تخلوني
فرگاکم هدم حيلي اوروحي المرض سلاها
اويلي من سمعها احسين رد امن الظعن ليها...گعد يمها يصبرها اوعلى الفرگه يسليها
يگلها یا ضوة اعيوني دمعتچ لا تهليها
يبويه للوطن ردي...اوخليني ارشد ابگصدي...ونتچ ذوبت چبدي
تراني امن اسمع اونینچ روحي اتزود بلواها
تگله اشلون اتم بالدار ولعرف وين منواکم...عگبكم من يسليني اويصبرني اعلى فرگاکم
يبويه اویاکم اخذوني اموتن وحتیي اوياكم
مني ليش تتعذر...وآنه اعلى البعد مگدر...ظعنكم ناحر ابها البر
ولا ادري رچایبکم وین ایصیر منواها
یگللها عليله انتي يبویه اوخطر مسرانه...وخاف امن التعب یا ذیچ لو خذناچ ویانه
تمي اهنا اوبعد أيام اوديلچ الريحانه
يجيبچ والشمل يلتم...گلیچ لا يظل مهتم...گلبي اعليج يتولم
لو شفتچ ابها الحاله اوروحي الحزن یعلاها
تگله كلكم اتغيبون وبگه ابها الوطن وحدي...مالي حيل فرگاکم اوذاب امن الحزن چبدي
يبويه عاد خليلي (عبدالله) الطفل عندي
بلچن یرد وحشتكم...اويسليني اعلى فرگتكم...اخاف اتطول غيبتكم
او تبگه دمعتي تجري ولا ینگطع مجراها
يگلها اشلون عبدالله نمشي اوعندچ انخليه...عليه امه اشيصبرها اوتصعب فرگة امه اعليه
يبویه (حرمله) الظالم لخوچ ابکربلا ایتانیه
صايغله لخيچ طوگ...لبسه بس علیه ایلوگ...چنه عاشگ اومعشوگ
يطوَّگ رگبته ابنبله تظل للحشر ویاها
لون عینچ یبویه اتشوف اخیچ سابح ابدمه...وسدَّر بيه للخيمه اومني تاخذه امه
نوبه تشم وجناته اونوبه ابمنحره اتشمه
اونوبه تخمش ابخدها...اولا يبگه عگل عدها...يبويه الله يساعدها
على افراگه اشيصبرها لو درَّت ثداياها
اردَّن بيه امن الحومه وبرگبته النشابه...مثل الطير ويرفرف بطل حيلي امن اصوابه
يبويه الطفل عبدالله اخوچ امنذكر امصابه
من عندي تشوغ الروح...اویعلاني الحزن والنوح...اردن بیه اودمه ايفوح
اومني تاخذه امه اونار الحزن بحشاها
