(معسكر الحسين عليه السلام)
خيَّم بالطفوف احسين لاچن من وصل ليها...الكوفه فزعت الحربه اوجرت کل اهاليها
بسما سمعوا المظلوم حط ابکربلا الثایه...المحورب غده ایحورب اورایه اتجر بثر رایه
منها اعلى الخيم دارت اومنها اعلى المسنایه
شحنت کل فجاج البر...اوجادم عالروايه الشر...سبعين الف لا واكثر
غير الله ابهذاك اليوم محد گدر يحصيها
الحريب ابكربلا احرب والمحشم غده ايحشم...اوکلها اتصيح لبن ازیاد يحسين اخضع اوسلم
لفانه گبل ما تلفي (مسلم) وانچتل مسلم
وانته اليوم مگصدنه...او غير الحرب ما عدنه...سلم لعد قائدنه
اولو ما سلمت يحسين تندم عاد تاليها
من شاف الحزم تتره اعلى حربه اوشحنت البيده...يردونه یطیع ایزید وعلى الذل يمد ايده
گال الموت اهونلي اوعمر الضيم ما ريده
طب احسين لطنابه...اونار الهظم لهابه...لم ابخيمته اصحابه
اوگام ابن الفحل يخطب اویشکر نعم باريها
گاللهم يفرساني اويمن للكون طاعونه...هذا الهضل بالميدان والصایح تسمعونه
عرفتوا الگوم نيتهم اوشنهو اللي يريدونه
مني يا نشامه اتريد...أبايعهم واطیع ایزید...والوي اعلى المذله الجيد
واذلن من بعد عزي اويعله اويعز طاغيها
اوغير السمهري والسيف ما ألهم بعد عندي...وجاهد دون دين الله واحمي ابمرهفي حدي
حته انچتل بالحومه اوتسيب اعويلي بعدي
اوعالهزل پرچبوها...والتنحب يضربوها...اولین ازیاد يهدوها
اوعگب الخدر والهيبة يصبح زجر حاديها
وانتم بخوتي الطيبين عالخير اعتنيتوني...وامري انعكس هذا اليوم بس حطيت بضعوني
مني ما عليكم باس لو ردتم تعيفوني
لوحوا على اظهور الخيل...وامشوا يخوتي ابهاالليل...حملى يا نشامه اثگيل
(اوغيري) اليوم هاي الگوم ما تطلب مواضيها
لَّمن سمعوا الانصار سلَّو كل صوارمهُم...گاموا لا چن اعلى الگاع تتساگط عمايمهم
تچنوا كلهم اگباله اوحبیب الليث جادمهم
يصيح اويهل دمع العين...انصارك تمد لا وين...من اتفارجك يحسين
شنهو العذر بالمحشر لو واجهت هاديها
عفنه ادیارنا اوجينه اوطلگنه الأهل يحسين...واجينه اوياك مگصدنه نجاهد دون هذا الدين
منَّ الله علينه بيك وبهاي اهلك الطيبين
لابد ما نسوِّي يوم...يبن الفحل ویه الگوم...اوناخذ بالطفوف اعلوم
اوهاي ارواحنه دونك اودون الحرم نفديها
گام انوب ابو فاضل اوسل السيف بیمینه...صاح انفارجك لاوین يا عزنه اویوالينه
وحدك من تظل يحسين شتگول الخلك بينه
اوشنهو العذر عد جدك...من نمشي او تظل وحدك...حتى انعيش من بعدك
او تشوف اعيونَّه اخواتك على الهزَّل امرچبيها
آنه اللي جبت زینب او من يثرب لفت وياي...وآنه اتچفلت بيها وعليها يرف الواي
اشلون امشي واخليها يسيره ابين هاي اعداي
يعضيدي اشتگول الناس...ما يوفي (البخت) عباس...ترضه ابگه امهبط الراس
وتم اوزينب ابن ازیاد بالمجلس يحاچيها
زینب موچبه او تسمع حچي العباس والانصار...صاحت والگلب مکسور وتهل الدموع اعبار
تراني ابشاربك لتگول يبن المرتضه الكرار
من يثرب لفيت اوياك...وعليَّه يرف الواك...يا عباس اجیت انخاك
ما ظن یاگمر هاشم تخيب اختك نواخيها
تعال اوشوف ابوفاضل لمن سمع نخواها...طلع ليها يسكتها وبروحه ایتفداها
يگلها بالوجود آنه اوعینچ یهل مجراها
يختي الخيمتچ ردي...انا وشوفي اعلى العده اشیسدي...ياهو اليوصل الحدي
لسوي ابکربلا عمله ما واحد يسويها
