صكت عليَّ كربله بشبانها
ابدور ومنازلها الثره...كلها بضماها امعفره
وتترقب الدفانها
والروس منها امقطعه نيشانها
امعطلين ابلا نعش...ومتيبسين امن العطش
وامغسله بدمانها
والجروح بعده ما وقف نزفانها
هذا من المنحر يصب...وهذا يصب امن القلب
واتغرقت تربانها
صوبين يتوله الوهج صليانها
وهج الرميض المنصهر...واتقابله شمس الظهر
واتصلخت لحمانها
وزينب تحشم بالثرى وليانها
تنظر جنايزها وتحن...وما تقدر اتقوم ابدفن
متحيره بقربانها
ومن هجمت الخيل انكسر ميزانها
غربه وشده بالحمل...ميتين طفله اويا طفل
واحسب بعد رضعانها
والخيام تتواره بوجر نيرانها
هذي عبايتها تشب...وهذي تطيح وتنسلب
وتتلوع بطيحانها
و ما هي بهيده تركض بهيمانها
مره المقطوع النحر...ومره إلى شاطي النهر
واتصفق بعشرانها
وصيحات ها يا عمتي بآذانها
ليه يعمه ما تجي...وما تقولي وينه نلتجي
واخيمنه ابدخانها
واتدوهشت زينب على صبيانها
هذي التلوه امن الضرب...وهذا يسحبونه غصب
واتمرغت قمصانها
ابنيات منها اتسلبت حليانها
هذي ابدمها امخرمه...وهذي إيديها امورمه
واتجرحت أبدانها
امن الخوف ما ردت حجي بلسانها
تشبح بعين وترتعش...واتلم سترها وتنكمش
وقوى تصك أسنانها
وامن الوجل ما حد سبق جريانها
تتراكض ابشب الرمل...واتطيح مره وتعتدل
ويغمى على عطشانها
وزين العباد اللي صبح ربانها
ابلا عمامه ولا رده...مسحوب بقيود العده
ويلوعه شيطانها
ودارت عليه الناصبه بأضغانها
وبالسوط داوت علته...وبلطم وجهه ورفسته
يلزم على وجعانها
وطبت عليه اتدافع بوحدانها
زينب ويضربها شمر...وبرمحه يوكزها زجر
وتصرخ على ضعّانها
بدر العشيره اللي كفل جيبانها
يا خويه ما قلت اركبي...وبراح جفي اتحجبي
ونامي على زندانها
طبت عليه اجفوفك بذرعانها
ومن عينك اعيوني انطفت...ومن راسي ادمومي انزفت
وسيل عليّ طوفانها
ومرت عليه اتودعه بشيلانها
وتقول يا بدر الوفه...أختك متنها ما شفه
وما حد بقى ما هانها
وما شافت اجفوفك على جثمانها
بس الدمايه ابقلبتك...وحاضن بزندك رايتك
واسهامك بدمانها
يا ريت عينك يندمل شوفانها
وتنظر خواتك بالسبي...امسلبات ابلا عبي
ومن حرمله روعانها
وما وعدت بالهون من زجرانها
من صيحة السوط بعجل...قومي ترى عزج رحل
يمخدره بفرسانها
وطافت جنايزها على ركبانها
هذا لحم نحره انمزع...وهذا عظم جتفه انخلع
بالخيل من دوسانها
شبان ما خط الشعر لحيانها
بريحة دماها امعطره...والروس منها امجزره
وامحنيه عرسانها
وما رحمت اعيون الشمس عريانها
لرماح بيها امكسره...وغير محاسنها الثره
ومنه فصيل أجفانها
وكلمن تدور بالفله ولدانها
ورمله عله اخضاب الولد...وليله على بدر السعد
وزينب على أخوانها
والله وبجاها الشيب من شيبانها
بساعه شيبها الدهر...من ساعة ارجوع المهر
يصهل على صيوانها
ومرت على شيخ الأهل سلطانها
مرمي ولا امسجه عدل...متوسد ابنحره الرمل
واتقرحت أجفانها
وطبت على الجثه تشم ريحانها
مو بس ذبح رض وكسر...ورسم الحوافر بالصدر
واتوجست كسرانها
كسرات سوتها عويج إحصانها
شبت وفوقه اتنزلت...واعظام صدره اتكسرت
واتفللت عيدانها
وألعن من اخيول فرسانها
اتعمدت دوس النحر...وردت ودارت للظهر
وشدة عليه اعنانها
وينك يا كافي الزلزله ورجفانها
وينه يا حيدر نخوتك...شالت سبايه نسوتك
وامجتفه بضعانها
ومقدر أوصف زينب بديوانها
اشلون قلبك يحتمل...مربوطه زينب بالحبل
وتتوسل بعدوانها
يقولون وقفت ما تشد أركانها
بالقيد قوه املبسه...وتنظر يزيد بمجلسه
واموجعه خصرانها
خلص دمعها من كثر هملانها
ولا يرتخي حبل الأسر...وكلما يسحبونه تخر
وتتعثر بنسوانها
وروس العشيره امعليه بمرانها
راس المجرح تنظره...وراسٍ تكسره المخصره
اتكسر ابشوف إعيانها
للنيب بالحنه ترد ألحانها
ولا الحمام اللي فقد...ولا فاقده عشر الولد
زينب تزيد أشجانها...زينب تزيد أشجانها