[ موشح للحسين والعباس (ع) ]
یمن گاصد كربله اوبدرينها...صيح ياعبّاسها اويحسينها
صيح وين الطفل عبد الله الرضيع...طوّگوا بالسهم روّوه النجيع
عند ابوه احسين وبكتره صريع...لاچن امّه عن طفلها وينها
اشلون صارت روحهه من شافته...سابح ابدمّه املولح رگبته
شبگته اوحنّت عليه اوشمّته...حين مهجتها اسچبت من عينها
نادته يبني اشسدر منّك ذنب...حتّه يرموك العده ابماضي النشب
خذت من دمّه اوغدت بيه اتخضب...راسها اووجناتها اوخدّينها
يعبد الله ارويحتي اوياچبدتي...ياضوه اعيوني اوعگلي اوسلوتي
اویاگمر بيتي اليشع ياونستي...اوتصدع المرمر غدت بونينها
تشم نوب ابوجنته اوبالنحر نوب...اوتضطرب نوب اوعليه نوبه تلوب
ذوّب امصابك يعبد الله الگلوب...واسهر الوادم طبگ جفينينها
صيح وين الاكبر الحر الشباب...بدر وابّرج الدمه غوّر اوغاب
اشلون گلب امّه اظن اعليه ذاب...اونارها تلهب حدر ضلعينها
آه لـمّن شافته ليله هوت...فوگ جسمه وبدماه اتمرّغت
لطمت اعله الصدر والخدها اخمشت...اوبالصخر صكّت يويلي اجبينها
ياعلي يبني يمن لـمّك چبد...او گلب ابوك احسين والبيتي عمد
ريت كل الكون دونك ينفگد...يابدر برّينها اوبحرینها
گامت اتجلّب بصاویبه اوتنوح...اوتحسب الطعنات وتعد الجروح
لگت من جرح الگلب دمّه يفوح...صرخت امّه اوواسته ابدم عينها
نادته ياريتنه عميه اولشوف...جسمك اموزّع يچبدي بالسيوف
يابدر لليالها اوشمس الصيوف...اظلمت حين الغبت عصرينها
صيح ياويلاه وين ابن الحسن...سهم للطبرات صار اوللطعن
اشلون سكنه اوزينب الفگده غدن...حین جابه احسين من صفّينها
شافن الجاسم امواصل بالطبر...اومن نجيع الدم لبس ثوب الحمر
صرخت اوعالوجه لطمت والصدر...اوصار مثل ام الفصيل احنينها
نادته سكنه اومدامعها تسيل...يابياض الصبح ياچوچب اسهيل
چیف ياموت الزلم تمسي چتيل...ياربيب الحرب وميادينها
نادته زینب اوصفگت ايد بيد...بحر باجسّام بالشانك الصيد
يمصباح الفجر ياغرّة العيد...بلعتك ياحيف حوتة بينها
نادته سكنه ولاچن اتعتب...يبن عمّي اهویت فرگاي اشسبب
الگلب منّي يجسّام التهب...وابمهجتي نار من سجّينها
صيح ياويلاه بدموع اتهمل...وين عون اوجعفر اوبحر الفضل
طبگ سبعه اوعشر نومه اعله الرمل...والاصحاب اثنينها اوسبعينها
جثث خلّوها ويلي اعله الطعوس...اوفوگ روس ارماحها شالوا الروس
لاچن اعله اصدورها السبّگ تدوس...بالحوافر والعده امسلبينها
