کسره او هاشم ابها اليوم فگدت بدر علياها
او ظلت من عگب عيناه تجري ادموع عيناها

يا من تنشد اعلى الجود وینه اوین عنوانه
روح اختبر من البيت ومن الحجر واركانه
ياهو الشرفه ابجدمه اومثله انشكر سعوانه
غير السيد السجاد * فضله اعلى الخلايگ زاد * خصه ابشرف بالميلاد
بي کسره ارتفع شانه او هاشم بيه يتباها

هذا المادحه الباري ايعرفه البيت واستاره
هذا البي اعگول الناس شرگ او غرب محتاره
هذا الما ينوش الضيم ويذل الدهر «چاره»
هذا الجود والمعروف * افضل من يحج ويطوف * هذا البلكرم ماصوف
بسما تجبل الوفاد بالمعروف حياها

ابد ما ولدت العيله او لا تولد بعد حرَّه
مثلك يا فخر هاشم او یا رافع مجد کسره
درَّه ابطالع الاسلام وبغرت الدهر درَّه
مثلك ما سده او لا صار * جدك حيدر الكرار * وامك بضعة المختار
ما طلعت شمس علناس واشرگ گمر لولاها

جدك شرفه الباري وزاد اعلى الخلگ شانه
وابوك اشچم ملك لجله رد اعلیه جنحانه
بي صارت على ابراهيم برد او سلم نيرانه
او آدم بي غفر ذنبه * او عن یوسف چشف کربه او یعگوب انبجح گلبه
او بي سارت سفينة نوح ومن الغرگ نجاها

لو ما بلوجود انته يوم العاشر ابعاشور
لمن طاح ابوك احسین وبسيف الشمر منحور
چان انگلب عاليها وامر الله نفخ بالصور
لاچن الكفر جازوك * بحبال الیسر چتفوك * لبن ازیاد من ودوك
عماتك تون وتنوح وانته اتنوح وياها
*
*
اشحالك من وصلت الشام وانته امیسر اومچتوف
اوعماتك على الهزَّل تتراجف واخذها الخوف
اوشفت الوادم امعيده اوفرحانه اوتدگ بدفوف
صارت عالضعن داره * وانتم بینها ایساره * اودمع العين يتجاره
خواتك عالهزل تبچی اوتتفرج على ابچاها

والاعظم مصيبه اعليك من طبيت للديوان
شفت ایزید عالكرسي اويمه اعلى التخت مروان
طشت الذهب گدامه لاچن مطرب اوفرحان
يضرب راس ابوك احسين * وانته اعليه تصد بالعين منه ایگول اخذت الدين
وستافیت کل دیني من حیدر ومن طاها

اومن رديت بضعونك لعد طيبه اوصلت الدار
گامت تگصد الشیعه تنشدك عالسده والصار
تصيح الشام آ یا لشام اصعب كل هظم وامرار
ظعنه من وصل ليها *طلعت کل اهاليها شفت كل الهظم بيها
اشحال البليسر تمشي اوتمشي ابولية اعداها

تمیت اعلى هذا الحال لاچن ابسگم حالك
لمن جرعوك السم والسم مرد دلالك
على افراگك يبو الباقر الله ایساعد اطفالك
ظلت عگبك ایتامه * او عزَّك فگدت ايامه اوخصمك حصل امرامه
واظلمت على اعيالك عگب عيناك دنياها

«الباقر» غسلك بيده او حزنك تلتهب ناره
اوشاف الگید بعيونه بعده ابرجلك آثاره
جروَّنه او صفگ بیده اوصاح ابدمع يتجاره
یا ذنب من عندك بده * اوساگك اعداك اتگیده * اوچبدك السم ايمرده
اوهاي امصيبتك هيهات بعد امصاب جاداها