اتوعی شبیه المصطفی وبطل ونینه...وابوجه ابوه حسين صاح وشبح عينه

ونادى يبويه يا شبل حيدر الضرغام...بالعجل وصلني على صدرك للخيام
تتزود النسوه من اوداعي ولیتام...وخلهم يبويه جرح راسي ايعالجونه

قله يبويه اشلون اشيلك يم لطناب...وجسمك اموزع بالهنادي وطعن لحراب
قله يبويه جمع اوصالي من لتراب...وبردتك لفني يسلطان المدينه

بانت علامات المنيه يا ضيا العين...وغوربت عيني واختفت لنفاس يحسين
ودني بشوف امي قبل ما يفجع البين...اشبيدي عليها اتظل بعد عیني حزينه

قله يبويه الراس لفيته ولوصال...ولازم اشيلك للخيم يا زين لقبال
والله يعين امك من تشوفنك ابها الحال...امطبر وجسمك بالهنادی اموزعينه

ولفه يويلي ابردته وادموعه اتسيل...وهبط وشاله فوق صدره وصرخ بالويل
بعدك على الدنيا العفا یا ضيغم الخيل...يا بدر سعدي وانخسف من قبل حينه

وجابه الخيمه وعبرته ابخده هموله...اینادي ونار الحزن تلهب في غليله
بالعجل قومي ودعي لكبر يليلى...وعصبي اجروحه وغمضي للموت عينه

من سمعت امه اطلعت مدهوشه بلا اخمار...اتنادي وتتعثر من الدهشه بلو عار
وسفه يطير السعد بیدي فرفر اوطار...يحسين دفنوني قبل ما تدفنونه

وقفت على جسمه ابعبرات سفوحه...تمسح ادموم الولد واتقلب اجروحه
صدت ولنه امغمض وفارقت روحه...قلها يليلى راح لا تترقبينه