في رثاء الأكبر :
يا نور العين يلكبر يالشباب...يا نور العين
بطل لونين يطاعون الحراب...يا نور العين
لا تون يا نور عیني ذوبتني ونتك
ارد اشيلك للمخيم عند زینب عمتك
خلها يبني تغسل اجروحك وتعصب طبرتك
هاي ادمومك يروحي ومهجتي...تجرى الصوبين
بعدك حيران بقيت ابوحدتي...یا نور العين
يا غصن بان وتلوى وحيف ما قضى العمر
جنت لي يالولد سلوه وخاني بیك الدهر
قلبي لمصابك تجوی والظهر مني انكسر
يا بويه البين فرى قلبي ابسهم...لجلك يالزين
بطل لونين بشيلك للخيم...يا نور العين
يا صبي عیني يلكبر ليتها عميت عيوني
ولا شفت خدك امعفر بالثرى يا نور عیني
ردتك التالي زماني والدهر خیب اظنوني
بطل لونين يشبه المصطفى...قلبي شطرين
بعدك يالشاب على الدنيا العفی...یا نور العين
وسفه يا ذخر ذخرته وراح ما عندي بديله
كان حسباتي يبويه هالحمل عني تشيله
وخاب ظني يا عزيزي والعدو اتشفى غليله
بعدك محتار يباقي عزوتي...واصفق ليدين
يتوقد نار حشاي ومهجتي...يا نور العين
صاح يا بويه ترى هو للمنيه قرب حيني
شوفها نزفت ادمومي وغوربت للموت عیني
بالعجل للخيم ودني للحريم ايودعوني
بطلت لونين يبويه وغوربت...عيني يحسين
ادمومي صوبين على اكتافي جرت...يا نور العين
دنق وشاله على صدره وقلبه من الحزن ذايب
وللخيم جابه ابحسره ومدده فوق الترايب
وطلعت امه من خدرها تسحب اذيال المصايب
وقعت في الحين عليه امروعه...وشبكت ليدين
تصرخ يحسين دقوم انودعه...يا نور العين
ضمته ابحسره الصدرها والحرم دارت اویاها
وطولها مدت ابطوله والحزن ذوب حشاها
اتصيح يبني انعمت عيني عقب عينك يا ضواها
يا بويه امنين عقيبك سلوتي...يا بويه امنين
صوبني البين يبویه ابمهجتي...يا نور العين
لا تون يا نور عيني ذوب اقليبي ونينك
الف وسنه يا ضنيني فرقوا بيني وبينك
بعد للعشرين يبني حيف ما بلغت اسنينك
لكبر وحسين بعدهم وين اروح...لوعني البين
بعد الطيبين عسى روحي تروح...يا نور العين
