[ موشح في الامام الرضا (ع) ]
يال بيت الدين يصحاب الشيم...منكم امن الچتل والسم من سلم
مالكم والناس يصحاب العبه...بس عليكم غدت بالشر محربه
سدر منكم شين غير الطيّبه...حشه اولولاكم الكون اصبح عدم
انتم السر الفلا احّد علم بيه...غير مابالكون عند الله اووحيه
النبي اوبضعته اوسبطاه اووصيه...والايمّه التسع بالعالم علم
وانتم الدوحه الّذي ابروض النعيم...والميازين اوصراط المستقيم
يظن جاحدكم الفاجر والزنيم...اله ابيوم الحشر بالكوثر سهم
لا ولاچنّه حظه ابورد الحمیم...اوسلك لاچن ناگته ابوادي الجحيم
ويل من اصبح شفيعه ليه خصيم...اوحين يتندّم فلا فاده الندم
من يگللكم الهادي يمّتي...ودعتكم عترتي اوذريتّي
اسگطيتوا اشسبب محسن بضعتي...اوفوگ حگها الضلع من عدها انهشم
وانتصب الكم لوه ابيوم الغدير...والد النورين شبّرها اوشبير
اصبح ابيّناتكم ماله نصير...یاوسافه الاسد تفترسه البهم
اونست من ناده النبي صخر اوحرب...يوم تطحن روسها ارحاة الحرب
الدار ابوسفیان مامون اليطب...اوأبد ما آمن اوما والله سلم
اونغله وافه المصطفه اوذرّيته...سم ابو محمد وهو ريحانته
اوحورب اعله احسين واعلگ رايته...طلب بجدوده اليعبدون الصنم
عاده بين الناس لليوم اوبعد...بالمواضي ثارها لا بالسند
هالّذي سفيان جدّت بالجهد...اوداوت ابدم السبط منها الولم
لاچن احچيلي اببني العبّاس وين...غدر الهم طلب عد حیدر اودین
اشراح منها اببدر وبغزوة احنين...زلم بيها ماسمعنه وانعلم
لاچن الهم جد تولّوه اببدر...اوجابته الطيبه الناس اويه الكفر
سامحه الهادي اوسؤّاله گدر...حيث من رحمه وله محسوب عم
يابني العبّاس چم الكم جرح...حدر ضلع المصطفه اوطعنة رمح
اودم مدامع فاطمه منكم تسح...حيث خلّيتوا الچبد منها خذم
آه من مامونكم سبّه وجب...گطع حبل الوصل گص حبل النسب
سم ابن موسی یويلي بِالعنب...اويظن غيره بالفعل دونه انتهم
ظل ابو محمد حلیف اوسادته...مثل عمّه الحسن يجذف مهجته
آه والسم لعد گلبه فتّنه...ایلوج مثل حسين من صابه السهم
بعث لخته خبر حاله المبتلي...يختي گومي امن المدينه اوعجّلي
من وصل ليها الطارش من علي...اوقرت مكتوبه الجبد منها انجسم
غدت دمع العين دم اتفايضه...واسرعت بالسفر سچّت بالفَضَه
گبل ما توصل اولن ناعي الرضه...مات فخر العرب بديار العجم
