عرّيسچ یا اسكينه
للقبر زفّينا...عرّيسچ یا اسکینه
اچفانه اثيابه...ودمه اخضابه
وامعفّر الخدين...عرّيسچ یا اسکینه
عاده لو شاب وتزّوج راد يتهنّی ابشبابه
والده يختار أحسن جنس ويفصّل اثيابه
بس يتيم الحسن غایب والده امفارق احبابه
عنه الأهل وينه...ماجوا یحضرونه
فجعته ابيتمه...وحنّته دمّه
زفّه بس عمه حسین...عرّیسج یا اسکینه
والنثار اعلى العرايس شرط بالزفّه ولازم
وصارت اسهام الأعادي انثار في زفة الجاسم
والسمع صارت محلها ارماح وابلمع الصوارم
والحرم زفّافه...والأبو ما شافه
صوت الهلاهل...نوح الأرامل
والورد ماي العين...عرّیسیچ یا اسکینه
ضِيفه للعرّيس لازم يعملون الناس لجله
والأهل تحضر الزفّه وللعرس تنصب الحجله
وحجلة الجاسم الحومه والذبايح صارت اهله
عمه البطل عباس...أسف مفضوخ الراس
وقطعوا الأعادي...منه الأيادي
واخوته مذبوحين...عرّیسیچ یا اسکینه
امبارك ابعرسك يجاسم یا اوليدي يا شباب
ابدمعتي أعجن الحنا ودمّك الچفي اخضاب
عرس ساعة وساعة يبني ليش متوسّد اتراب
وسفه يبعد الروح...جسمك يظل مطروح
عمتك زينب...تبچي وتنحب
قومي غمضي له العين...عرّیسیچ یا اسکینه
جلست اتقلّب اجروحه والحزن بالقلب يهلب
اشفته غرّبت عينه صرخت وصاحت يزينب
چان مات الولد ساعة يظل بعده العمر ما احب
شوفه فقد صبري...بفدي الولدعمري
وعدلي رگبته زین...عرّیسیچ یا اسکینه
نزف دمّه ويح قلبي وبطّل الجاسم ونینه
ونظر لمه ابطرف عينه وانخطف واصفرّ لونه
يفحص ابرجله ومالت رقبته وغمّض اعيونه
وخرّت عليه امه...تصرخ واهي اتضمه
تنزف اجروحه...وفارگت روحه
وانذبح لجل الدین...عرّیسیچ یا اسکینه
