أضف الموضوع
الشاعر السيد سعيد الصافي الرميثي - 19/04/2012م - 12:00 ص | عدد القراء: 2746
يــحــســيــن ...يــبـن الـزهـره يـحـسـيـن
قلبي خلصت إذنوبه ...و جيتك أطلب التوبه ...يبن الزهره يحسين
مـوقـف من الحر يلفت الأنظار...ليش يتراجف و بالحرب مغوار
نـفـسـه خيرها بين جنه و نار...و إعتنه إينادي يبن حامي الجار
خــلــصــان ... هــذا الــعـمـر خـلـصـان
و أدري الموته مطلوبه...و جيتك أطلب التوبه ...يبن الزهره يحسين
قـصـد يم حسين و الدمع يجري...جيتك إيقله و عبرتي إبصدري
أغـسـل إذنوبي من دمه نحري...و ألتمس تقبل شكوتي و عذري
أنــخــاك ...جــيــتــك أبــجــي و أنـخـاك
إبـجاه أمك المحجوبه...و جيتك أطلب التوبه ...يبن الزهره يحسين
مـا أرد عـنـك لـون أتـوذر...منهو يشفع لي إبساعة المحشر
لـو شـفت جدك منه شتعذر...و أنظر إعله الحوض والدك حيدر
الــمــحــتــار... لــتــرجــع الــمـحـتـار
إيـريدك تستر إعيوبه...و جيتك أطلب التوبه ...يبن الزهره يحسين
صـوت بـالـجـنه إيبشر إسمعته...و قلت ما ينزال ذنب الذنبته
و درب ضـعن حسين آنه غيرته...بيه حرم و أطفال و آنه روعته
مــطــلــوب ...إبــهــذا الـذنـب مـطـلـوب
و لا بد للضعن حوبه ...و جيتك أطلب التوبه ...يبن الزهره يحسين
و الغريب بحسين رد عليه إجواب...يرحم الباري و يرد كل طلاب
و عـنده للتوبه إمفتحه الأبواب...و الحور إتوجاه و بدمع سجاب
غــفــار ...غــفــار يــا مــن إنــت غـفـار
إعليك الرحمه مكتوبه ...و جيتك أطلب التوبه ...يبن الزهره يحسين |
|
