أضف الموضوع
الشاعر السيد عبد الخالق المحنّه - 04/05/2012م - 5:22 ص | عدد القراء: 7870
أوصـيـكـم عـلـه الـغـالـي...و لا غـيـره شـغـل بـالي
يـعـذبـني إذا سافر يعذبني...أريد إبني يرد سالم أريد إبني...أوصيكم
يـيـمه إخوان يوسف ذبحو الخوه...تره إنباع إبثمن و الثمن ما يسوه
اوعـدونـي لـبو اليمه العمر فدوه...تروحون أربعتكم بس يظل هوه
أنـا إشـقـد مـا أحـبـنـكـم...أبـو الـيـمـه أعـز منكم
يـشـيـبني إذا يحزن يشيبني...أريد إبني يرد سالم أريد إبني...أوصيكم
يـيـمـه الـموت مره و العمر مره ...تظل بس المواقف للبشر ذكره
أمـانـتكم أخوكم هذا أبو العتره ...رضه إمكم ييمه من رضه الزهره
تــوافــوهـا تـوافـونـي ...أنـا أمـكـم إسـمـعـونـي
تـعـاتبني تره الزهره تعاتبني...أريد إبني يرد سالم أريد إبني...أوصيكم
يـبـو فـاضـل ييمه إبيوم مولودك...بجه حيدر عليك و قبّل إزنودك
أسـمـعه إيقول رايه و كربله و جودك...يقلك يالغيور إتوفي بوعودك
يـبـو الـغـيـره إجـه يـومـك...يـخـبـرونـي عله إعلومك
دجـاوبني يبو فاضل دجاوبني...أريد إبني يرد سالم أريد إبني...أوصيكم
لـون بـيدي أروح الكربله إوياكم ...مثل زينب عزيزه أمشي بحماكم
و أهلهل بالحرب يولادي و أنخاكم...و أخطب شيبتي و إجفوفي بدماكم
لـون يـقـبـل أبـو الـيـمـه ...رحـت لـلـطف و أظل يمه
يـحاربني الزمن بعده يحاربني...أريد إبني يرد سالم أريد إبني...أوصيكم
يـيـمـه إبكربله الموقف تسجلونه ...يضي العين راس إمكم ترفعونه
أخـوكـم ثـم أخـوكم لا تعيفونه ...إذا دارت رحاها موتكم دونه
إذا دمـكـم تـضـحـونـه...قـلـب أمـكـم تـفـرحـونه
يحاسبني ضميري إيظل يحاسبني...أريد إبني يرد سالم أريد إبني...أوصيكم
إذا عـنـي مشيتوا ما يظل صبري...و لا تنفع بعدكم دنيتي و عمري
أنـا إويـه حسين أصيح و ينكسر ظهري...قبل نحره ييمه ينقطع نحري
قـبـل دمـه جـره دمـي...قـبـل جـسـمـه إنسحق جسمي
يـصوبني سهم جبده يصوبني...أريد إبني يرد سالم أريد إبني...أوصيكم
إلـي جـفـين عالشاطي يقطعوها...و انا إبسهم الغدر عيني يصيبوها
يـيـمـه إجـروح قلبي ما يحسبوها...و أشاهد زينب الحره يسلبوها
يـضـربـوهـا يـضـربـونـي ...عـلـه الـهـزل يـركبوني
يـسـلـبني اليسلبها يسلبني...أريد إبني يرد سالم أريد إبني...أوصيكم |
|
