أضف الموضوع
الشاعر السيد سعيد الصافي الرميثي - 27/04/2013م - 12:54 ص | عدد القراء: 4702
جـنـه شراكه بجسد قلبين ...يبني
تـالي إفترقنه و صرنه قبرين... يبني
بـآخـر نفس ناديت يحسين ...يبني
هـذا الإحـساس العبر حد التفاني
عـن وفـاء أم الـبنين أروع معاني
سـاعـة الودعها صاحت يبني تاني
يـا حـسين إعليك أخافن من زماني
قـالـوا تريد الكربله إتروح ...يبني
ما بين إيديك إمسلمه الروح ...يبني
شحمل صبر ما عندي روحين ...يبني
أبـدي مـن يـوم المشيت وودعتني
بـيـن ظن إغيابك و جيتك عفتني
مـن سـإلـتك و المدامع جاوبتني
لـيـش أقـول إويـاك ما خذتني
مـن بعدك إبيا حال ظليت ...يبني
إلـمن أظل وشعندي بالبيت ...يبني
مـثل الحمامه إبلايه جنحين ...يبني
يا من الأجلك سبب علت وجودي
يـا مسك خاتمة عمري و يا خلودي
و بـرحـيلك ذبّلت يوليدي عودي
و الـدمـع تـارك نياشين إبخدودي
جـنت أعتقد تاخذني وياك ...يبني
قلي إشيداوي إجروح فرقاك ...يبني
يـا مـن عفتني إبين جرحين ...يبني
لـيلي ليلك من رحت ما ساعه نمته
و الـونـيـن إعليك ما يوم القطعته
نـاعي فقدك من رجع ينعه و سمعته
يـا عـزيـزي الموت من ربي طلبته
عـمري إبرحيلك بعد شفيد...يبني
يـا مـن عـليَّ قبرك إبعيد ...يبني
شـلـي بحياتي يا ضوه العين ...يبني
جـنت أظن إبجفك إتغمض لي عيني
وبـوجـودك تـنختم لحظة سنيني
جـنـت أظن عباس من يسمع يجيني
لـو شـفتكم عن شمالي و عن يميني
تـسـهل عليَّ شهقة الموت ...يبني
يا محله صوتي أصرخ إبصوت...يبني
واحـد أجـنـه إشغيره إثنين...يبني
قـبـلما أموتن شفت صورة فجيعه
حـسـين شفته إبجفه شايل رضيعه
شـفته محني الظهر يم صوب الشريعه
و إعله صدره إيضم الجفوف القطيعه
نـحت و صحت يرفعة الراس ...يبني
يـبـيـاض وجه أمك يعباس...يبني
يـا واهـب الـزهراء جفين ...يبني
إظـلمت الدنيه إعله أمك يا قمرها
مـن طفوا ضيّك طفوا شمعة عمرها
مـا سـألت إجنازتي يا هو الحضرها
مـنـهـو شال أمك و نزلها إبقبرها
جـان الأمل يا أغله الأحباب...يبني
جـفـك عليَّ إيهيل التراب...يبني
درب الـبـقيع إتناشد إمنين...يبني |
|
