أضف الموضوع
الشاعر ميرزا عادل أشكناني - 29/11/2014م - 11:55 م | عدد القراء: 5796
ناده الحسن و اعله الوجه... تتفايض العين
يبن أمي هذي اوصيتي ...احفظها يحسين
ابعينه عبره...خل ينظره ...تتفايض العين
راح أودعك يا أخو الما صح مثيله
كل خليل و لابد ايفارق خليله
و أول اوصيه يبن حامي دخيله
يا عضيدي هالله هالله بالعقيله
خلها ابجفن عينك و خل ... تحرسها الأهداب
تدري اختنا امعوده ...عالعز و الحجاب
و انت أدره...خل ينظره ...تتفايض العين
قله و اعيونه تصب عالخد دمعها
ثاني اوصيه أظن قلبك سمعها
اجنازتي الطاغي إذا صدها و منعها
ادفني بجوار الذي كسروا ضلعها
ووصي القمر عباس ... لا يشهر الصمصام
حتى إذا شاف النعش ...يرمونه بسهام
وش يصبره ...خل ينظره ...تتفايض العين
و ثالث وصيه قبل لا تغفه عيناي
يا عضيدي و أدري تفهم مطلبي ابهاي
جفي ساعة دفني لا تدفنها وياي
بيها خل ساقي العطاشه يجلب الماي
و لو طاحن اجفوف القمر ... يم الشريعه
خل البديل اجفوفي ... لجفوفه القطيعه
جفي ذكره...خل ينظره ...تتفايض العين
مد إيدينه و خله جف منها اعله جفه
الثانيه مدها الدمع عينه تنّشفه
و قله هذي اوصيتي ما ظنها كلفه
البنتك اسكينه ردت جاسم تزفه
سكنه بمثابة بنتي ...و جاسم اوليدك
ساعة زفاف إبنك يخويه ...اتزفه بيدك
بيدك أمره...خل ينظره ...تتفايض العين
آخر وصيه الحجاها و دمعه مسفوح
قله يا خويه الكريم ابطبعه مسموح
حته لو عمري قضيته و فاضت الروح
خل مضيفي عامر و خل بابه مفتوح
بعدي أريدك لو قصد ...ضيف و إجا لي
تستقبله يحسين ... و تتلقاه بدالي
ابهذا فكره...خل ينظره ...تتفايض العين |
|
