أضف الموضوع
الشاعر واثق العيساوي - 09/01/2015م - 11:27 ص | عدد القراء: 2260
قرينه اعله السمه هاي البشاره ...محمد بالفرح نوّر دياره
هله بنور الذي طال إنتظاره ...محمد يا محمد يا محمد
إجه ابعينه حلم و بروحه غايه
نزل رحمه و يلم كل البرايه
كتب معنه السلم أجمل روايه
قراها و كل حرف اسطوره قاله
نزل نور السمه كله ابجبينه
رغم قضّه ابيتم عمره و سنينه
إذا هاج البحر إسمه السفينه
ابصفات الباري مصنوعه خصاله
على مرسه النجاة الدنيه خلاها
على ادروب الخلاص الناس دلاها
حروف إسمه أهيم ابشوق و أقراها
محمد يا محمد يا محمد
بالأخلاق الوضِع صحح مساره ...محمد بالفرح نوّر دياره
هله بنور الذي طال إنتظاره ...محمد يا محمد يا محمد
صنع من الألم منهج حياته
معاجز إي نعم جانت صفاته
لغات الرحمه و الرأفه لغاته
صنع لجل البشر دنيه جديده
صفات ابدنيته يملكها طاها
و لا قبله نبي مثله احتواها
إجه اقلوب البشر كلها قراها
جيوش امن الفقر حاربها بيده
جمع دولة يتامه ابيته يرعاها
ينشف ادموعها و اجروح شافاها
أبوهم صار و الله المصطفه طاها
محمد يا محمد يا محمد
حلم جان و إجه بعد إنتظاره ...محمد بالفرح نوّر دياره
هله بنور الذي طال إنتظاره ...محمد يا محمد يا محمد
معاجز للنبي لو نحجي بيها
أكيد بفاطمه من نبدي بيها
صفت سر النبي و أم الأبيها
نفس علم النبي و حلمه و صفاته
نمر بحيدره نفسه و حبيبه
عجيب و مظهر ابعلمه العجيبه
نصير المصطفه و روحه و قريبه
علي وحده علي من معجزاته
معاجز بالحسن و حسين شفناها
فقط بأهل الكسه المعبود خلاها
تفسير المحبه اللي ملكناها
محمد يا محمد يا محمد
صبح رحمه عله اقلوب اليتامه
بِنَت عشها على بابه الحمامه
يمر مثل الحلم طيب و سلامه
و نثر عالدنيه كل عطفه و أمانه
إلى كلمن يشوه هالحقيقه
و يزل عن الصدق يترك طريقه
طبع بالماس ميفارق بريقه
و لا طبع النجم يترك مكانه
على صدره المقدس نزلت الآيه
مخلّص للبشر و بروحه هالغايه
تظل فوق الشفايف أجمل احجايه
محمد يا محمد يا محمد |
|
