أضف الموضوع
الشاعر علي السّقاي - 07/04/2015م - 8:43 م | عدد القراء: 8875
قرآن بسفر...و أربع تراتيل
ما عندك خبر...عنهم يجبريل
دعيت الله و نبيه...الوحي ينزل عليه
ما عندك خبر عنهم يجبريل
عن طيبه...طلع قرآن يسعي و هجرته الدنيه
هالغيبه...عليّ طالت و أقول اتأخر ابسعيه
و بريبه...تموت امن الرعب روحي و ترد تحيه
شيجيبه...قلت أسأل أمين الله على وحيه
بهاي القافله...قرآني الحسين
ترتيلي إله...بالأربع ابنين
أرفعت للرب اديّه...الوحي ينزل عليه
أسراري...يجبريل إبتدت بالخلقه و المنشأ
بأعباري...أسألك عن إمامي و عِلّة المبدأ
أفكاري...تموج و قلبي بالشر صار يتنبأ
و بداري...أنا اللي راح أقلك يالوحي إقرأ
اقره اللي جره...بسم الله سواك
حسين اشأخره...يا سيد الأملاك
ابحرائي هالمسيه...الوحي ينزل عليه
ما عندك خبر عنهم يجبريل
تعرفني...و أعرفك يالجنت عند الوصي خادم
شرفني...علي بأم البنين و هاللقب دايم
يكلفني...رحيل حسين و الله بحالتي عالم
و بجفني...عله احدود البجي ظل دمعي متزاحم
يوم اموادعه...لازم له حراس
أهديت أربعه...و أولها عباس
و أنا بهاي الهديه...الوحي ينزل عليه
ما عندك خبر عنهم يجبريل
من حيدر...حيادر بيهم الساحات ملزومه
للمنحر...عله الرايه القمر ما واحد ايسومه
أتصور...نزل ميكال عجّج غبرة الحومه
عالمعبر...نشر عزريل جنحه و عبست ارسومه
يفدون الدمه...أبنائي وصيت
ظنوة فاطمه...يرجع تمنيت
ردت عن هالوصيه...الوحي ينزل عليه
ما عندك خبر عنهم يجبريل
كل حيلي...انهدم ما أدري ليش بعاشر محرم
اروي لي...إذا عندك درايه و بالسبب تعلم
يا ويلي...أحس بداري جن ريحة حرق تنشم
و بليلي...أون ابلا سبب و امتوني تتألم
من أرض النبي...و اديار الأحباب
أشعر بالسبي...ما اعرف الأسباب
أريد الهالقضيه...الوحي ينزل عليه
ما عندك خبر عنهم يجبريل
ظل حاير...دليلي و اليحير أفكاره مو بيده
شالصاير...أشوف اخيال دم ايغرق البيده
يا ساتر...أخاف اتقول إمامي اتقطع اوريده
و بباجر...ترد مسبيه زينب ما هي ابعيده
من ترجع إلي...يا خوفي أحتار
يا هي بت علي...اتغيرت من الصار
و إذا فعلاً سبيه...الوحي ينزل عليه
ما عندك خبر عنهم يجبريل
عالغالي...قبل ما بشر ابن حذلم يجي و ينعي
اتعنالي...الوحي و صوته الحزين ايردد بسمعي
يقرالي...ينفس المطمئنه للخلد رجعي
أوحالي...أشق جيبي عله حسين و أهل دمعي
اعرفت الفاجعه...من هاي الآيات
جنّ الله نعه...حسين الذي مات
يريت ابهالمنيه...الوحي ينزل عليه
ما عندك خبر عنهم يجبريل |
|
