مـاصار بـالعالم مـثل بـضعة الـهادي...عـلة  وجـود الـكون مـن أوّل وبـادي

هـيـهات مـايوجد مـثلها فـي الـبرايه...نــوَّر الـعالم نـورها وهـاي الـنّهايه
لـكن  بـمقدار الـشّرف قـاست رزايـه...انـصبّت  شـبيه السّيل نازل على الوادي

فـقد  الـحما ومنع البواجي وقطع الظلال...ونـار الـجزل بـالمنزل وترويع الاطفال
وشـوفة عـلي الـمرتضى مـقيود بحبال...والـلي  دهـشها وراعـها صوت المنادي

قـولي  لـعلي يـطلع وخـلي هالاباطيل...خـلّى  مـدامعها عـلى وجـناتها تـسيل
نـكـباتها مـاتنحصي ورفـسة الـضلِّيل...بـالمسجد  وخـرّت ومـنها القلب صادي

ولـزمت فـراش المرض تالي ليل ونهار...تـنحَّل جـسمها من الهضم والضّيم وانهار
وبـآخـر  الايّـام اجـا حـيدر الـكرّار...تـعجن لـقاها وطـين يـمها ابنة الهادي

قـلها عـجب مـنّك يـبت خـير النبيّين...بـيـدك اعـمال اثـنين لـلدّنيا تـعملين
قـالت  مـن الواجب عليّه العجن والطّين...حــال  الـبنات أعـدِّله وحـالة اولادي

خـلصت مـهمّتها وهـي مـاتقدر تـقوم...خـبزت  وغـسلت راس زينب وام كلثوم
اغـتسلت  ونامت والوكِت ماهو وكِت نوم...وقـصدت الـمسجد فـضّه بحيدر تنادي
 
عـجِّل تـرى الزّهرا مَندري اشصار بيها...الـحق  عـليها ولا أظـن تـلحق عليها
إجـاها  ولـنها مـغمّضه وسـبلت إيديها...دنّـق  يـخاطبها يَـبنت احـمد الـهادي

جـذبت  الـونّه وفـتحت الـعين الزّجيّه...وقـالـت يـحيدر عـايفه الـدّنيا الـدنيّه
ودّعـتك الله وهـاللي عـد راسي الوصيّه...ادفـني بـليل ولا يـحضروني الاعـادي