يا دمع اسأل حسين...ذبحوا إقباله طفلين
قارن ابين الاثنين
ها يبو السجاد و المدمع يصبرك
بالله يا موقف أشد من قطع نحرك
من شفت محسن وقع و انكسر ظهرك
هم شفت عبدالله مذبوح اعله صدرك
حاضر انت و شفتهم...بالدمع ودّعتهم
قلبك اليحوي جرحين...قارن ابين الاثنين
محسن اينادي و ضلع أمه تكّسر
احضر احضر يا علي للزهره احضر
و ابنك ابحضنك ايلوج ابشدة الحر
ينظر اعله المشرعه و قلبه تفّطر
و اكتفه ابنظرة احساس...ما يرد عمه عباس
مشرعه و بيها جفين...قارن ابين الاثنين
ينكسر قلب الأخو اليفقد عضيده
ينهدم صبره اليموت ابنه اعله ايده
هذا خوك و انت يوم الطف تريده
و ابنك الضامي ابسهم قطعوا وريده
عينك اشافت أحزان...يا دمع يروي عطشان
عينك اتهل دمعتين...قارن ابين الاثنين
واحد ابعصره وقع و انت نظرته
واحد ابسهم الغدر مالت رقبته
محسن اعله أمه بجه و تسمع حسرته
و ابنك اعله الماي ما جفّت دمعته
و العطش ويلي ماذيه...حرمله ابسهمه يرويه
يا حسين الألم وين...قارن ابين الاثنين
من وقع محسن يحس أحبابه عنده
و ابنك الضامي يحس بالغربه وحده
مات أخوك و حيدره يحفر له لحده
و ابنك ابقبرك عله صدرك توسده
خلي جرحه عله اجروح...و الذبيح اعله مذبوح
لو سألنه اعله لحدين...قارن ابين الاثنين
محسن اعله القاع و الزهره تصد له
و ابنك المذبوح يم زينب توديه
طاحت أمه و كل خواته طاحن اعليه
يا طفل منهم شفت زينب تناغيه
عمه ما تنحمل هاي...ميت بحسرة الماي
ناغته و صفقت ايدين...قارن ابين الاثنين
واحد ابيومه اندفن و أمه الزجيه
واحد ابلايه دفن و أمه سبيه
يا بو الأكبر يا جرح أكثر أذيه
الجرح بالباب لو بالغاضريه
كل طفل شاهد النار...شبّت الخيمه و الدار
نارك و هذي نارين...قارن ابين الاثنين
