هالليلة مجروح الوحي بسابع سمه كبّر
ضلعي اويه ضلعج فاطمه عصروه و اتكسر
بدموعه يتعذر...من فاطمه و حيدر
يا فاطمه آنا الوحي الجنت أخدم ببيتج
تحسدني أملاك السمه جيه آنا تربيتج
من هجموا اعليج العده بجناحي حاميتج
من طاح محسن عالثره بدموعي واسيتج
و أعذاري تتكرر...من فاطمه و حيدر
موقف خليل الله الصعب بأمر الله أديته
عن نار نمرود التشب يالزهره حاميته
و إنعاد نفس الموقف بحامي الحمه و بيته
بابج و ناره المضرمه بجناحي طفيته
و اتغير المنظر...من فاطمه و حيدر
بالبير يوسف من وقع و بدمعه ناداني
من قبل ما يمس الأرض حضننه جنحاني
ابنفس الوضع للمحسن اتعنيته بأحزاني
اتلقيته منج من وقع و الدمعة بأجفاني
سال الدمع أحمر...من فاطمه و حيدر
كلش عجيبة قنفذ ايضربج عله امتونج
و انتي الجليلة العالية الصار العرش دونج
دم سالت اعيون النجم من لطموا اعيونج
لون الغروب أحمر أخذ هاللون من لونج
ظل ينزف الكوثر...من فاطمه و حيدر
تتيمم أنفاس الضوه يومية بترابج
ستر الله سترج فاطمه نور العله احجابج
ملعون من شب الحطب يا فاطمه ببابج
تبجي القطوف الدانية هالليلة لمصابج
و اتناثر الجوهر...من فاطمه و حيدر
مو عجبة حيدر لو بجه مولاتي مو عجبه
الفارق حبيبه ينكسر و اتوالفه الغربه
الله يساعد حيدره بيده دفن قلبه
و اموادعج كلش صعب و امصيبتج صعبه
جم ضلع التكسر...من فاطمه و حيدر
جم ذكره ظلت فاطمه بعيون أيتامج
ثوبج الخطبوه بالدمه و ادموع آلامج
بعيون زينب هالمسه مذبوحة أحلامج
كلما يمر بيها جرح تتذكر أيامج
تصبر بعد أكثر...من فاطمه و حيدر
