دمعتي ابهالرحمه غارس...خضّرت عشق المجالس

ناذر حياتي الخدمتج يا زهراء...و زارع دمعتي ابرحمتج يا زهراء

وداني حظي الخدمتج وداني...و للزهرة خادم كل محب سمّاني

شنها نصيتج فاطمه السواني...من أذكر أسمج قيمة أحس للساني

أتباهه لو أحس بألم يا زهراء...و احروفج امن ألفظها دم يا زهراء

يا فاطمه و كل دنيتي بتسيارج...خطارج آنا و ما خسر خطارج

امنيتي بيه الباري ينصب دارج...حته امن أميل أجرع ألم مسمارج

ويه النفس يجري الدمع يا زهراء...و أسمع إذا طق الضلع يا زهراء

غيمة و يصب اعله الأرض معروفج...بحر المحنّه و ما كو حد لجروفج

بعالم خيال آنا و دمعتي انطوفج...أشتم دمعتج حته لو ما شوفج

و أتخيل الشال الحطب يا زهراء...و باب العله اضلوعج قرب يا زهراء

يالزهرة من أذكر مصابج عيني...تجري و احس جف الجمر يجويني

لو ما أذكرج كافر آنا بديني...غير الله لج يا فاطمه امسويني

حته المشاعر هاي إلج يا زهراء...محروقة إيديج أتخيلج يا زهراء

محدود عشقي و ما تحده احدوده...الحد المكان الانتي بيه موجوده

وداعة جرح عين الكفيل وجوده...لو ما رحمتج عمري ذابل عوده

لو ما رحمتج و العشق يا زهراء...إلمن قلب عبدج يدق يا زهراء

كلما تضيق أصرخ و أصيح ادخيلج...يالبلفكر منبر عشق باني لج

قدامي انتي و هسه أريد أحجي لج...لو بيده كسر اضلوعي بلك اوفي لج

و ابجفي أسطر وجنتي يا زهراء...و بعيني أرسم حيرتي يا زهراء