وجه السمه الخالي...ما بيه قمر عالي
أمشي بلا اخيالي...يمكن مشه الغالي
آنا أعرف اوليدي القمر جنت أحلف بزوده...ما يخلف اوعوده...لو قطعوا ازنوده
آنا أم اليبيض الوجه عالوفه ربيته...و بزغره حاجيته...بحسين وصيته
لاجمني قلبي ابهالمسه...وين الضوه امسافر...ليش القلب حاير...بس لا قدر صاير
أسمع صده ابروحي...أتباهه بجروحي
و أتخيله ببالي...يمكن مشه الغالي
عباس إذا بعدك عدل...ظلمه السمه اشبيها...إلا إنت لو بيها...جنت أنت ضاويها
بس لا حسين ابلا ضوه...صبح الحرب ظلمه...من ضيك اتحرمه...معقوله يا يمه
يا يمه عنه لو رحت...فقدك يهد حيله...عن العدو و خيله...راح أعقد الشيله
اقنعني بغيابك...قلي السهم صابك
خل تعرف آمالي...يمكن مشه الغالي
كل حلم مر اعله الجفن...بغيابك اتفسر...بس يمك اتحّير...من اوصل أتعثر
دورتك ابروحي و شفت...بيه الحزن ديره...يا صاحب الغيره...تدري البعد حيره
بالرؤية شفت بنظرتك...دم يجري من عينك...ردت ألزمت ايمينك...ما شفت جفينك
دورتك ابليلي...أتعب و ألم حيلي
لكن قلت تالي...يمكن مشه الغالي
ويا من أبعث لك خبر...متحيره ابهايه...يالتاخذ احجايه...لا توقع الرايه
احرس خيم زينب مثل...وقفت علي الطاها...مو تنسه ترعاها...يالرايح اوياها
بّخر خيمها بخوتك...اختك و تستاهل...من قالوا الكافل...قالت أبو فاضل
خليها بعيونك...من تبقه من دونك
يبقه الضعن خالي...يمكن مشه الغالي
عطشان احسك ما روت...ريجك و لا قطره...أمك و بيه أدره...احساسي عالفطره
إي يمه ظل ضامي...ما شربت اعيالك...و الماي إذا جالك...خل صورتي اقبالك
معقولة ما يقبل نهر...انتم تشربونه...عنكم يمنعونه...لو خله بعيونه
شوف النهر وينه...ودي عله اسكينه
قله اخبر اعيالي...يمكن مشه الغالي
يوليدي صدرك لا يظل...ما بيه أثر نبله...صح هيه مو سهله...بس الحسين أغله
و اتوادعوا و بجوا الصخر...و اتذكروا العشره...هوه البعد فتره...تجمعكم الزهره
تدري الوداع ويه الأخو...بيه ترخص الدمعه...من تنطفي الشمعه...تشتت الجمعه
و آنا أشعر امصابي...من ترحل أحبابي
من حزني يصفالي...يمكن مشه الغالي
يُّمه من أجيلك للقبر...يا هو اليدليني...يا هو اليواسيني...عالدمعه البعيني
خلي لي جفك عالقبر...حته اقدر أندلك...و اعيوني توصلك...و أتبرك ابظلك
واعدتك بقبرك وعد...و اعيونك اتشوفه...تتعنه ملهوفه...أحبابك اتطوفه
يالشايل الرايه...خدامك اهوايه
حزنوا مثل حالي...يمكن مشه الغالي
باجر عزاءك ينصب...يا يُمه بأحزانه...بيه فاطمه و آنه...يمّه احضر اويانه
تلقانه بطراف العزه...نبجي عله امصابك...نتذكر اغيابك...و انشارك أحبابك
مر بيهم ابوكت البجي...كلهم ينطرونك...خلهم يشوفونك...و السهم بعيونك
راوي أهلك و ناسك...الدمع البلراسك
صمتك شغل بالي...يمكن مشه الغالي
