أبلغك سلامي...و أنا بلا مُحامي
قبل لا أمشي عنك...يبو الغيرة أطمنك
و أنا بلا محامي
هدء ليلي و بقه صوتي الذي ينحب
سكت حته الهجيج البلخيم يلهب
إجيتك يا قمر ليش ابدمه امخضب
و أحس اتقلي رحمي ابحالي يا زينب
أواعد همومك...بعدما ألومك
إلي لا يعله ونك...يبو الغيرة أطمنك
و أنا بلا محامي
اجيتك عالنهر عباس محنية
اجيتك حيث أدري ما إلك جية
الحرق ما قول ما خله خيم ليه
أظن شميت دخان الخيم بيه
احرقوا كل خيمنه...و لا رف علمنه
بعد خل يغفه جفنك...يبو الغيرة أطمنك
و أنا بلا محامي
إذا عندك بعد نية و تريد اتقوم
يخوية اشناطر أكثر ذبحوا المظلوم
أسولف عن رضيعه البلسهم مفطوم
لو كافي أجيب اقماطه كله ادموم
بعد خل أزيدك...ترضرض عضيدك
ابحوافر ما إجنك...يبو الغيرة أطمنك
و أنا بلا محامي
تطمن يالقلت شيصير بغيابي
عقبك خوية آنا بخير بمصابي
أروح اويه العده و ما سمعك اعتابي
ألبس رايتك لو سلبوا احجابي
أروحن سبية...و لا تفزع إليه
مصابي لا يحزنك...يبو الغيرة أطمنك
و أنا بلا محامي
تطمن عالخدر ياللي قلت بحماي
الخدر آنا التركته و ما أريده اوياي
أريد اركض و أريد أتعثر بممشاي
و ألم أيتام تشرد من سياط إعداي
أباري الضعينه...و أيّس تجينه
تجينه ما أظنك...يبو الغيرة أطمنك
و أنا بلا محامي
تطمن يالجنت تمسح دمع عيني
اشما أبجي تسكتني و تواسيني
نام ابرغد و آنا بوني خليني
أكو اللي ابلطمة صار ايسكت اونيني
و أناطر جفوفك...لجن ما أشوفك
و لا تدري كأنك...يبو الغيرة أطمنك
و أنا بلا محامي
تطمن لا تقول ابضعني من يحدي
الشمر موجود و آنا من أمشي مو وحدي
لاجن قبلما رد الوطن جدي
وقفات بدواوين الزلم عندي
الجبتها أميرة...عفتها أسيرة
عدوك يحدي ضعنك...يبو الغيرة أطمنك
و أنا بلا محامي
الحجي قاسي لجن قلب الاخت معذور
أطيب خاطرك بس خاطري مكسور
عله اجفوفك يبو فاضل ألف مشكور
و أنا قد الكفالة و أستحق هالدور
تراني العقيلة...أصيرن كفيلة
تعلمت آنا منك...يبو الغيرة أطمنك
و أنا بلا محامي
آنة الاسفة يالعالنهر مطروح
لا تطلب سماحي وبالفعل مسموح
أخاف ابحجيي ضفت اعلة الجروح اجروح
يريت أقدر أرد اجفوفك اويه الروح
يخوية بوداعك...أقبل ذراعك
و إذا تسمح أحضنك...يبو الغيرة أطمنك
و أنا بلا محامي
