خفّف علينا القيد وارحمنا يسجّان...احنا من اهل بيت النّبي وبينا الدّهرخان

مسلم ابونا والأهل كلهم سلاطين...جدنا علي صاحب البيعه وخالنا حسين
و ذيج العشيره صاح بيها صايح البين...ظلّوا على حرالثّرى وضاعت النّسوان

واحنا انهزمنا و روّعتنا هجمة الخيل...بالبرّ توّهنا وعلينا هوّد الليل
ولا درينا اشصار بالنّسوه و العليل...يقولون جابوهم سبايا لارض كوفان

قلهم شعبتوني وفت قلبي حجيكم...زغار اويتامى اشحال قلب امكم عليكم
من ايّام يا بعد الأهل مرّوا بسبيكم...فوق المطايا وخالكم راسه على سنان

بعيني شفت حرّه على ظهر المطيّه...ذوّبت قلبي تنوح نوح الرّاعبيّه
وكلمن نظرها قال هذي الخارجيّه...نوبٍ تحن ونوبٍ تباري الرّضعان

و مرّت علَيْ ناقه بلا هودج ولا مهاد...وحُرمه بظهَرها من النّواعي تفت لَكباد
تنادي شعبني فقد اخوتي وفقد الاولاد...راحوا اولادي وخايفه غيلة العدوان

ويّا الحرم عاينت شاب مقيّدينه...يبجي على اهله وبالسّلاسل باهضينه
وكلما يون يوحّش العالم ونينه...جنّه مريض و من العلّه الجسد نحلان

قلّه على وَصْفَك هالمغلّل بالزّناجيل...هذا البقيّه من عشيرتنا البهاليل
واللي تحن وتباري النّسوه والعليل...هاي الوديعه مخدّرة فارس الفرسان

واللي وراها فوق ناقه تجر ونّه...وتنعى على الأولاد هاي الضّايعه امنه
ياليتنا ابهالخبر لقشر ما سمعنه...ويا ليت نمنا ويا العشيره ابفرد ميدان