يوسف ما رموك ببير أحزانك...لو أم البنين الربّت إخوانك
لو مسك خطر يرحون لك فدوه...ما تربه الأسود إلا بحضن لبوه
لو أم البنين الربت اخوانك
ريت الأربعه وياك يحمونك...لا توقع ببير و لا يبيعونك
و الرفعت مقامك ما يحسدونك...ما تغله الرقاب الخاطر اعيونك
هاي أم الأسود الحره ربتّهم...مو بس باللبن بالغيرة غذتّهم
غذتهم شهامه و مرجله و نخوه...ما تربه الأسود إلا بحضن لبوه
لو أم البنين الربت اخوانك
عافوك و مشوا مرتاح خاطرهم...ليش اتعاتب الماتت ضمايرهم
شوف بكربله اشكتبت بواترهم...لجل حسين تتقطع مناحرهم
يا يوسف بريء الذيب من دمك...مشكلتك لأن عباس مو يمك
ينطيهم درس عباس بالخوه...ما تربه الأسود إلا بحضن لبوه
لو أم البنين الربت اخوانك
رجعوا يم أبوك و قبلوا إيده...قالوا له قميصه و بيه دم اوريده
كلام أم البنين اتقوله و اتعيده...اليجيني ابغير أبو السجاد ماريده
أريد اصدوركم دون الأخو ساتر...يمه ما يموت اليحسب الباجر
يستاهل خدرنه اجفوف المروه...ما تربه الأسود إلا بحضن لبوه
لو أم البنين الربت اخوانك
أخوتج لو ربوا بأحضان هالحره...ما شالوا رماد و عافوا الذره
ييوسف علّمت عباس من زغره...حارس زينب و خادم لبو العتره
يبوس إيد الحسين و يوقف إجلالاً...تسمع بس نعم و اتدلل و حالاً
عرفها ابلا حسين الدنيه ما تسوه...ما تربه الأسود إلا بحضن لبوه
لو أم البنين الربت اخوانك
أمك ما جوتها جمرة الفرگه...و لا ظلت بدربك تلطم بحرگه
ونين أم البنين ايسكت الورگة...بردة و الحنينة تدفه بالملگه
إجت رحمة الموت بقسوة الغيبة...ييوسف و اليضمه القبر شيجيبه
و العطشت ابنها اشلون تتروه...ما تربه الأسود إلا بحضن لبوه
لو أم البنين الربت اخوانك
ييوسف و الشمل بعد الفراق إلتم...رد يعقوب شوفه و راح ذاك الهم
لجن أم البنين اشكثر تتألم...ما ردوا ولدها رد ابن حذلم
من سمعت بمقتل صاحب الراية...قالت و النعم ما خيّب ارباية
قال إلها ملك ماي النهر قوه...ما تربه الأسود إلا بحضن لبوه
لو أم البنين الربت اخوانك
تصرخ وين أخوتي رافع ايمينك...ما واحد إجاك و لزم جفينك
لو صاح السبط ها يالاخو وينك...يسمع أربعه يصيحون عد عينك
صاحوا أربعتهم قول مولانه...خدامك و أخوتك دوم تلقانه
واحدهم بجفه ارماح تتلوه...ما تربه الأسود إلا بحضن لبوه
لو أم البنين الربت اخوانك
ما ودوا قميص و يحمل أخباره...بس ودوا أختهم تحمل ابشاره
أبشرج عالشريعه ايمينه و ايساره...و السبعين ألف سجدوا البتاره
غاروا أربعتهم و الأرض مالت...و الجابت مثلهم بعدما جابت
شبه السيل نزلوا و الأرض رخوه...ما تربه الأسود إلا بحضن لبوه
لو أم البنين الربت اخوانك
