نسيتك ثواني...خيالك إجاني
إخذني الشاطي حبك...أريد أعطش و أكتبك
خيالك إجاني
ذكرتك من نسيت و بيّن اخيالك...أثاري انت العزيز الخالني ببالك
حاولة أستقر أسأل عن أحوالك...لقيت النهر قطره بعين شلالك
جمالك قصيده...مينحز وريده
نهر آني اعله دربك...أريد أعطش و أكتبك
خيالك إجاني
أريد ارسم اعيونك حته أحاجيها...شرط دم و تراب و عطش ما بيها
عله صدرك علامه و صافن اعليها...أخاف أكتبها و العباس يمحيها
علامه اتركتها...كأن ما شفتها
أثر رفسه اعله قلبك...أريد أعطش و أكتبك
خيالك إجاني
إجيتك و الغزل بأشواقي يتعثر...لقيت الشاطي أحمر و النهر أحمر
أشوفك تبتسم و آنا أرتبك اكثر...لأن صدري صحيح و صدرك امكسر
منعني حيائي...أجيك بردائي
يظل عاري اليسلبك...أريد أعطش و أكتبك
خيالك إجاني
مليته اتراب خدي من شفت خدك...نعم كلك عطش بسما ذبل وردك
خفت مرتين يغتال النهر جبدك...جبت ماي الشريعه و خيّمت عندك
أحبك لأنك...نبض قلبي منك
حلم شاعر و أطلبك...أريد أعطش و أكتبك
خيالك إجاني
تخطيت المسافه البينك و بيني...وصلت الباب جرحك و انطفت عيني
ضعت و اتوسلت مولاي خليني...أشاهد خنصرك و أنطيك جفيني
كتبت الرواية...و أريد النهاية
إذاً خليني قربك...أريد أعطش و أكتبك
خيالك إجاني
إذا ما ينذبح ابني على صدري...صعب ترسم احساسك قافية شعري
إذا ما ينكسر عالمشرعه ظهري...أسولف عالأخوه و آني ما أدري
مته ما خيامي...يسعرن أمامي
أحس شنهو اليعذبك...أريد أعطش و أكتبك
خيالك إجاني
حسبت اجروحك الألف و تسعميه...كسور اضلوع صدرك أكثر اشويه
رسمتك عالأرض أشلاء مرميه...جمعتك و العقيله اتباوع اعليه
جريمه الحوافر...تدوس المشاعر
أتيه من أحسبك...أريد أعطش و أكتبك
خيالك إجاني
