من بعد زهرائنه...اتبدلت أسمائنه
آنا يا مذبوح اسمي...و انتي يا مسبية
بعدما ما صلينه وحشة للزجية...قعدي يا زينب أسولفلج رزية
اسمي من هسه ذبيح الغاضرية...و انتي مو زينب بعد اسمج سبية
يموت ابونه اقبالنه...الحسن ما يبقى إلنه
يغفه يومية جرح...و يفز جرح يومية
الكربله من هسه نقعد نحسب احساب...الفاطمياتج يخويه كثري احجاب
اهناك خليها اعله بالج ما كو أي باب...الخيمة لو طاحت تنامين اعله التراب
نار التشوفيها...بجفج اتطفيها
مثل أمي اجفوفج...اتظل بالجمر مجوية
من قبلما بالضعينه الكربله انروح...اتعلمي يختي عله تضميد الجروح
انتي أول وحده تنظر نحري مذبوح...اتشاهدين اشلون مني تطلع الروح
بمنحري اتقبليني...ميت اتبّجيني
و بعباتج يالحبيبه...اتظللين اعليه
يختي من هاليوم لازم تستعدين...من الخيم للتل تخليتج تركضين
خويه قدامج جثث بالج تضيحين...و آنا أزحف لج إذا عالتل تصيحين
ابكربله اتدوريني...ابمصرعي تلقيني
وجهي دامي و فوق...راسي اعمامتي ما هية
أرد أحلفج زينب براية عضيدج...شمر لتحاجيه أخاف يحز وريدج
الخيل من تسحقني تبتعدين أريدج...اضلوعي من تتطشر اتلميها بيدج
خنصري اتضيعينه...بجفي ما تلقينه
يختي عشرة من الحوافر...تظل ترفس بيه
الناقة من هسه أريد اتعاينيها...اشلون تمشي و هية هودج ما عليها
قعدي يم كل فاطمية و علميها...اشلون تحمي احجابها المجتوفة ايديها
من قبل ما صايرة...هاشمية و حايرة
السبي يصعب عاللي...جانت بالعرش محمية
