لا تظل حاير...يا رهين الساعه
إگصد الكاظم حاجتك يگضيها...يا رهين الساعه
* * *
يا لمنجرح گلبك إبشفرات الهم...ماضيات أشفاره
إرشد لعد دار السلام إو تسلم...إمن الدهر وأخطـاره
وإگصد البسمه إندرج إسم ألأعظم...وإعتبر بأسراره
وإطلب الحاجه...يا رهين الساعه
من البلا شكر إو عوض ينطيها...يا رهين الساعه
* * *
دسمع يمن بيك الدهر حط إصواب...إو ما يطيب إصـوابه
لا تفزع إو لاتجزع إو لاترتاب...إمن الدهر وأنيابه
لو ردت من الفرج تفتح لك باب...دونك إدخل بابه
إبذروة الكاظم...يا رهين الساعه
مفتوحه بيبان الخلد تلگيها...يا رهين الساعه
* * *
يالچبدك إبجمر الغصص يتحمس...والوگود الونه
إو ليل العسر چلچل عليك إو عسعس...للجواد إتعنه
لو ردت مصباح الفرج يتنفس...من نسيم الجنـه
للكاظم إرشد...يا رهين الساعه
إو من ريع جوده الجمرتك طفيها...يا رهين الساعه
* * *
إگصد البوجوده ثبت گطب الكون...والفلك دورانه
إگصد البوجوده نظام المسكون...منتظم وجدانه
إگصد لعد سر ألإله المكنون...وإغتنم رضـوانه
وليها المگاصد...يا رهين السـاعه
ألله إو رسوله إو عترته ترضيها...يا رهين الساعه
* * *
إگصد البيمينه المشاچل تنحل...من علي برهانه
إگصد البوجوده المصاعب تسهل...والفرج عنوانه
إگصد إلمن فضله الخلگ تتأمل...شاملات إحسانه
إگصد الكاظم...يا رهين الساعه
وإخذ إمن أهلها الغانمـه إو رد بيها...يا رهين الساعه
* * *
إگصد كريم البالمكارم محمود...بالصحف تبيـانه
إگصد الميزيده العطه غير الجود...والمچارم شانه
إشما زادت الورّاد من بحره إيزود...بالكرم طوفانه
شد وإجهد إو جـد ...يا رهين الساعه
وإغرف الجوده من بحر راعيها...يا رهين الساعه
* * *
جد إبمسيرك لا تگصر إجدامك...وإجهد إبمجهودك
إو نور الولايه خل يلوح إبمعناك...إو خل يِّزكّي إوجـودك
وإگصد ضريح إللي تمدله يمناك...تغتنم مگصودك
وإستلم منـه ...يا رهين الساعه
تسكرتـك إبيسر العسر ماضيها...يا رهين الساعه
* * *
إگصد الكاظم لا يفوتك هالفوز...وإقتدي إبزواره
وإشما تود نفسك شرف منه إتحوز...لو نزلت إبداره
أجرك ألآخرتك يزاير محروز...بالنعيم أثماره
دوك إرشـد إرشد...يا رهين الساعه
الدارين رجها وإغتنم صافيها...يا رهين الساعه
* * *