طب كربلا ضعن حسين...والمهر اوچب بيها
* * *
من وگف بالطف مهر عود السجاد...وارتجل عنه ولاح غيره ولا جاد
حتى تعله ظهور سته من اجياد
عيَّت من الجـد وحسين...يعلم بسر ماضيها
* * *
صد على اصحابه اونده بيها الجيدوم...ونشدها ما هالدار اسمها يگروم
والغاضريه والطفوف المعلوم
واسماء كثره الهالدار...وبكربلا إنسميها
* * *
واتوسط اصحابه اوخطب راعي الزود...ناداها حل الوعد يبحور الجود
چن هذي دار الچنت بيها موعود
من گبل مـن الأرواح...ياخذ عهد باريها
* * *
بهالأرض مصرعنه اومسيل ادمانه...وجسمي دمه غسله او ذاري أچفانه
وراسي يشيله الشمر فوگ اسنانه
وبالحافر الخيل اتگوم...لضلوعي اترض بيها
* * *
بهالدار تمسي زينب المحجوبه...منسلب عزها امكدره اومنهوبه
وتمسي حرمنه اميسره اومسلوبه
تمشي يسيره للشـام...واعداكم اتباريها
* * *
ما بين ميخاطب هله والأنصار...لن زينب إتنادي يبن حامي الجار
عدمن إعيالك تظل بين المختار
عگبك غريبه ابهالدار...ومحيره اتخليها
* * *
لزمت إعنان امطهمه وتجري العين...محروس بالله ياعزيزي يحسين
تنچتل نيتك والفواطم لاوين
تنطي وجهها ولديـار...هاشم منو إيوديها
* * *
ناداها لا تبچين يا بت حيدر...حزنچ يطول وعگبي نوحچ يكثر
اليجري علينه من الباري امگدر
هودي يبت حامي الجار...للحرم لتروعيها
* * *
