عليلة الحسين وحيرتها
«إهجيني»
يا حسرتي وإمصابي...من علتي وإغيابي
صفت ألليل إعيوني...وإمجرحات إجفوني
من علتي إو غيابي
* * *
طفله إو عليلة حاله...والوهن صاب إعظامي...إو گطّع سبيبة عيني
دم إو دمع همـاله...من جرح گلبي الدامي...بين إخوتي إو ما بيني
روحي العطش ماذيها...إولا ماي اليرويها
إو لحگت سراب إضعوني...وإمجرحات إجفوني
من علتي إو غيابي
* * *
يعگوب گالو عنّه...فاجد شباب إبعصره...وإيصيح يبني يبني
إيجذب عليه الونّه...إو بيّض إعيونه إبصبره...والصوّبه صوبني
صبري ميگصر منّه...وإبأمري هيّن أمره...خل يگعد إيحاسبني
إسباطعش يوسف راحو...عني إو علي ما ردّو
إو ما طنتي ينسوني...وإمجرحـات إجفوني
من علتي إو غيابي
* * *
أيـوب گبلي إتمرض...والشده چانت وحده...فضت إو شاف الراحه
مو مثل گلبي إتعرض...للنايبات إتصده...وإتگطع إبسباحه
وأصبح دليلي إمعـرض...والماضيات إبچبده...وأشفارهن جراحه
أيوب گلبه إتبلسم...مومثل گلبي إتجسم
وإمعلعله خلـوني...وإمجرحات إجفوني
من علتي إو غيابي
* * *
لا خنسه ونت ونـي...إو لا ثكله صارت مثلي...بالدهر وإتجر حسره
والمرض خلوه عني...نوحي إو نحيبي إعله أهلي...من الزمان إو غدره
إفراگ ألأهل دوهني...إو جمر المدامع تهلي...ولاجمره تلذع جمره
أحّا ينـار الشالو...وإشحسّبو وإشگالو
بالدار من خلوني...وإمجرحات إوجفوني
من علتي إو غيابي
* * *
إلمن اصد وأتفكر...وأحجي إبثجيل إهمومي...لا ظل حمه إو لا والي
چا وين أخويه ألأكبر...عني إو عمامي إو گومي...إتضمد جرح دلالي
للطف ضعنهم سـدر...ما بعد أشوفه إبنومي...وإفراگهم چتالي
والظعن عينـي إتشوفه...إو غدرت بهلنه الكوفه
وإبوالـدي فجعوني...وإمجرحات إجفوني
من علتي إو غيابي
* * *
أصبح غريبه إبداري...والـدار لو شافتني...إبعين الغرب ترعاني
وأذبلت بيها أثمـاري...إبضيعة هلي ضيعتني...والغرب گص إلساني
وأمر المگدر جاري...وإسهام إله صابتني...هيچي الدهر خلاني
لاظل ولي إو لا چاره...إو لا خـدر لا عمّاره
وإبضيعتي ضيعوني...وإمجرحات إجفوني
من علتي إو غيابي
* * *
أصفن وأحاسب روحـي...وين البدور التزهر...راحت إو وين الرايه
ناغاني دم إجروحي...عمچ إبطفله إتگنطر...تلفگيه عالمسنايه
خليني اجود إبنوحي...وإبعلتي أتمرمر...دهري هدم مبنايه
إوسهم الدهر يتمني...دنياي أبد متهمتني
والموت خيّم دوني...وإمجرحات إجفوني
من علتي إو غيابي
* * *
