حبيب الأسدي
«شيعتي»
قائد لوه الدين...بالنهضه الحسينيه
حامل نياشين النصر...والنصر عنوانه
بالنهضه الحسينيه
* * *
حشم أنصاره حبيب إو هز لواها إو خطب بيها
إنعرضت إبسوگ المنايه الغانمه ومن يشتريها
إشلون نخوه إشلون نهضه إنهضت فرسان الكريهه
إبشر يفاروق اللوه...وياك مسرانه سوه
وبالجنه تغيير الهوه...والتدورها عليها
وياك وياك...بالجنه إو حـواريها
دونك الجنه مثمره...وأثمار ألاجنان
بالنهضه الحسينيه
* * *
مؤتمر ديني ومحل المؤتمر ذروة الرايه
إتراشدو صفّو النيّه وإستعدو للمنايه
وإرسمو للحرب خطه من مقاييس الهدايه
التوحيد صار إلهم علم...والعدل صار إلهم قلم
والحبر من دم الشيم...والعمل حب الولايه
فصّلو لامـات...حربيه إنسجو بيها
منسوج إيمـان الگلب...وإنطوه إلإيمان
بالنهضه الحسينيه
* * *
هزها للرايه حبيب وهزت أركان العوالم
والشيم هاجت بهلها وجردو بيض الصوارم
وأشرعو سمر العوالي وإنگلو بيها المغانم
بإسم الحسين ونصرته...للموت حيو ساعته
وللشرف نزلو ساحته...والهدف خدر الفواطم
وإتشرفو بيه...وأضحو للشرف عينه
وإختارو المـوت إبشرف...والشرف وجدانه
بالنهضه الحسينيه
* * *
زبد وإتراعد حبيب إو صاح وين التحمي الحد
وين سيافة الدين إلبيها عزم الدين يشتد
وين نگالة إرماح إلإلها بالطعنات مشهد
حل الوعد حل الوعد...وين اليصدگون العهد
وين اليذبون الجهد...لعد ريحانة محمد
نادوه عيناك...وإفرح يالتنادينه
منعز عله حسين العمر...والعمر لاچان
بالنهضه الحسينيه
* * *
بِشر وإستبشر حبيب وگرّت ألأنصار عينه
وراية العز إعله راسه وصارم النصره إبيمينه
جاوبو بإللي تريده گبلك إحنه إمحسبينه
للغانمه للغانمه...ونحجل الخيل إبدمه
وننعم نواظر فاطمه...لو گضه حگ العلينه
گول وفعل صار...من وافو مناياهم
وإختـارو العز والسعد...والسعد صيوان
بالنهضه الحسينيه
* * *
صاح إبن ظاهر يشوس الراضعه إبمرضع النيبه
ما تنام الليل عين الخلفت زينب إبريبه
گومو وياي الخدرها ونتساهم بالمصيبه
گصدو إسباع الزمجره...ونادو وديعة حيدره
متغربه يمخدره...لا يزينب مو غريبه
عالمـوت ماشين...خدامچ يبت حيدر
ممشاهم إبـدرب العدل...والعدل ميزان
بالنهضه الحسينيه
* * *
صدي يمودعة حيدر شوفي ألأنصار وجهدها
إرگابنه بحدود خدرچ ساعة الشده نمدها
إسيوفنه إنسلت وهاي إنحور عدوانچ غمدها
بصدورها إنكسر السمر...وميعزعله خدرچ عمر
وإحنه إنذخرنـه إلكم ذخر...من النشأه ومن عهدها
للعهد نوفيـه...وإنأدي التريدينه
والمنكتب ما ينمحي...واضح التبيان
بالنهضه الحسينيه
* * *
گالو وفعلو ونالو بالفعل مسكن الجنه
وقائد الفرقه حبيب إبدم مصوايبه تحنه
وخلف إبگلب الحسين إمصابهم جمرة الونه
أللهُ أكبر وإشجره إبحال حسين...عالماتو إو دمهم حيه إوجود الدين
منفجع گلبه ويهمل دمع العين...للمعاره من تعنه
وينادي ينصار...مشكوره مساعيكم
حيه عله خير العمل...والعمل برهان
بالنهضه الحسينيه
* * *
صبر أبو السجاد منه عالم العلوي تعجب
من ندب يحباب گلبي إبنار فرگاكم تلاهب
چنت إعاتبكم ولاچن ما عله المحتوم معتب
گامت تموج إجسومهم عالغبره...وأرواحهم نايمه إبحجر النصره
وإنكسر خاطرها إعله كسرة ظهره
وإتفيض العيون...بالجنه إعله أبو اليمه
من التهنّو وإچسبو...والچسب رضوان
بالنهضه الحسينيه
* * *
عگب ما ودع أنصاره وشكر همتها وسعيها
هاللّه هاللّه إشلون ردّه للفواطم رد وليها
وإطلعت زينب تنادي والرضيع إبّين إديها
هـاك إخذ طفلك دخنت منه العين...عطشان طفلك وحگ جدك يحسين
ومنين أجيب الماي يبن أُمي إمنين
* * *
