بطولة علي الأكبر عليه السلام
«ميمر»
شـد عالمهر شبل حسين...يوم العمر ميدانه
* * *
من الخيم أشرگ بدر بالكونين... وشبحت عليه من آل أميه كل عين
منهم الگالو والنعم شبل حسين
حي هالأسم...صال إبعزم
شگ الحزم...خله الزلم
تتجفل وكـل منعوت...ذل وخفض جنحانه
* * *
إو هجّت مرج تسحب بعنتها الخيل...چالصاعقه حدر عله اصحاب الفيل
من صارمه اليمطر حجر من سجيل
شـد إو عزم...بألله وعزم
بيده لزم...موت وجسم
وإنساگت إبحد السيف...لأسفل درك عدوانه
* * *
فوگ الگلب كوّر أطراف الجنحين...أظهر ومنهم فرس مايه وعشرين
ذكرهم إبحملات جده إبصفين
نعم الولد...وسفه إنضهد
من الزرد...رد ألأسد
العوده وطلب شربة ماي...يطفي الگلب نيرانه
* * *
ناده يبويه من العطش چبدي ذاب...وثگل الحديد أضهدني يبن ألأطياب
رد يبني وإشرب چاس من داحي الباب
رد منتشع...نوره إو يشع
زر الدرع...طش الجمع
وتخبّط إبگلب الكون...وإتفرس إبفرسانه
* * *
شد العزم بألله وتمسك بالدين...خله الزلم ما تدري منجاها إمنين
وعيّن العينه وچتل باجي الميتين
عگب النصـر...حل ألأمر
بابن الطهر...وگوس الغدر
عيّن السهم الچتال...وإلما خطه إبنيشانه
* * *
من عالمهر بموسط العسكر طاح...إتولوه إبيض الباشطه وألأرماح
إدركني يبويه وحضر عنده من صاح
وعله النـفل...دمعـه إيهمل
شاف النبل...بي متصل
وسابح إبـدم الميدان...ومعفّر إبتربانه
* * *
ناده يبويه ويا شبل سيد الكون...حالو عليك إعداك صرعوك إشلون
آمر عمامه للشباب إيشيلون
وإتلگته...إتحـن عمّته
من شافته...إبدم رگبته
إمخضب وشان المنصور...دم النصر عنوانه
* * *
