بطولة ألأكبر ومحاسنه
«الصدر دارمي + إهجيني»
محله الولـد محلاه...من والده ينخاه
لو شد عله الخياله
* * *
محله الولد لو شال...حمل الوغه إبمجهوده
وعالغانمه ينهال...لو سمع نخوة عوده
ويلاعب العسال...بيده ويفصّم إعجوده
حي الولد حياه...ويأدي حگ إرباه
لو شد عله الخياله
* * *
شان الولد ممدوح...لو أده حگ الوالد
يرخص إبغـالي الروح...بين إيد أبوه إيجاهد
شاف المرح مسموح...بأمر العزم والساعد
هيف إو مرح ممشاه...ويتبهلل إبمعناه
لو شد عله الخياله
* * *
گرّت إعيون حسين...همة شباب ألأكبر
زم رايه بإسم الدين...مثلت راية حيدر
جدد حرب صفين...بالغاضريه وخيبر
هز رايته إيمناه...والعوده گر عيناه
لو شد عله الخياله
* * *
محله الولد بالكـون...يدرع برفعة راسه
وإعله الحرب طاعون...تمطر سحابة باسه
فازع لبوه وعون...متحزّم إبنوماسه
من يجبل إعله إعداه...ما ينحمل ملگاه
لو شد عله الخياله
* * *
محله الولد يرضيه...للوالد بكل شده
ويفرح إبزود إلبيه...لو ثبت جدمه إبحده
ومن يلكد إتباريه...لوليده قطعة چبده
وينگطع من إحشاه... گلبه ويشد إوياه
لو شد عله الخياله
* * *
محله الولد لوصـار...شمعة عمامه وگومه
والوالده شنيار...يرفع الطيب إعلومه
يطفي يشب النار...من يكد عالملزومه
للحرب يتولاه...ويچفّنه إمن إدماه
لو شد عله الخياله
* * *
محله الولد لو چان...يلزم لبوه ديوانه
ومن يعمر الميدان...يحمل ثگل ميدانه
وبصورة ألأكوان...يرسم شبح عنوانه
ومن فارس اليهواه...كون إتحصل منواه
لو شد عله الخياله
* * *
