ليلى تحشم ولدها
«العجز هجري + حسيناوي»
هاك إخذ سيفك هاك...وإحفظ أسراره
يولِدي إو شـد عالحرب...بس إخذ گلبي إوياك
وإحفظ أسراره
* * *
ساعدك شد ساعدك يولـدي إعله السيف...ساعدك شده
يالتمثل والدك بالضنك والريف...إو ساعة الشده
إو عزم أبوك إو عزم أبوك إيخيف...گوم التضده
وإبني مجـد الماضين...وإحيي آثاره
وإلزم الحد يولدي...وإنطي مرسوم الثدي
والحليب الغذاك...وإحفظ أسراره
* * *
إويـاك يالأكبر ورد إخذ من إحشاي...ريع دلالي
خايفه إبيوم الطرد ما يصح الماي...إلك يالغالي
إلي إبوجناتك ورد إو يزهر إبدنياي...روض آمالي
لو ذبـل غير الماي...ما إله چاره
إخـذ دمعي إبراحتك...وإطفي جمرة چبدتك
لو يبس ريـع إحشاي...وإحفظ أسراره
* * *
يولـدي إو حگ الربه عالولد ذمه...عندك إعلومه
ناتج إحجور ألإبه يبذل الهمه...إو ينطي مرسومه
يا ولد بالجاذبه أخذ گلب أمه...إو نزل للحومه
والگلب راعي الدار...وإنته خطّاره
ينصدع من تنصدع...يتصرع من تنصرع
وإيتخضب بدمـاك...وإحفظ أسراره
* * *
يبني گلب الوالد بالولد مسؤول...وحده ميعوفه
إخذ گلبي إو ناشده وإسطنت شيگول...عالثمر خوفه
إبعاضدك وإتعاضده إو بالحروب إيجول...ساعه وإتشوفه
والگلب ما يرتاح...إله بثماره
إو لو وگـف بيك المهر...يشگف الطعن إو طبر
يگف گلبي إو يتنـاك...وإحفظ أسراره
* * *
زم ألأكبر رايته إو شد عله الجيمان...وأنشر إجعوده
إو گلب ليله إبصحبته للنبل والزان...عارض إوجوده
ها يالأكبر نخوته إخبط الميدان...وإغتنم زوده
إو بالخيم ليله إتصيح...سدر الغـاره
يبني دزيت الگلب...إوياك يجهد بالحرب
راعي گلبي إو يرعـاك...وإحفظ أسراره
* * *
وإحرب إبهمة هلك من تصف الخيـل...يبني مثلها
بالوغه إتدير الفك يا گوات الحيل...همتك خلها
واليساند صولتك راية التهليل...گلبي يحملها
يبني والرايه إتريد...هيبه قهّاره
إو لوثگل حمل الفـزع...گلبي جدامك يگع
إو من تگـع يتلگاك...وإحفظ أسراره
* * *
ماهر إبخطف الزلم ,إنحراف الروس...عن قوايمها
حازم إبفل الحزم وإرتفاع الشوس...عن ملازمها
مشهر إبسيف العزم وإبرنين الطوس...صدف جادمها
غط ألأكبر بالكون...وأخذ شنياره
لن گلب ليله إيحدي...ها يالأكبر يولدي
زودك إيوافي إرباك...وإحفظ أسراره
* * *
