يا قمر العشيرة
سدوا الماي الماي...يا ضوه عيوني
يامن الهاشم گمر...وانته ملزوم إبهاي...يا ضوه اعيوني
* * *
اطلعت من برج السعد بت علي واتگول...يا سعادتنا
يالمطوگ بالعهد اوحارس المسؤول...عن كفالتنا
دنت ساعات الجهد والجهد مبذول...دون خـوتنه
إشـرد عليها العباس...ما تنشدوني
صاح آنه الموت الحمر...چى يمربيچ الخطر
وآنه سيفي ابيمناي...يا ضوه اعيوني
* * *
صاحت ادري ابشيمتك لليريدك عون...تلزم احدوده
خويه وادري ابهمتك تنسف المسكون...تعدم اوجوده
ياعجيد اورايتك ما يضمها الكون...ابعـزمك او زوده
ضنوتي او لو ظنيت...صدگت اظنوني
بيك يا رب الوفـه...راحتي اوعيشي صفه
ابنزلتـي وابممشاي...يا ضوه اعيوني
* * *
بالخيم سكنه اسمعت صوت بحر الجود...ويّه عمتها
اطلعت لاچن شطلعت...او شچت حالتها
يعم عطشانه اصرخت والچبد ممرود...ماي رادتها
يعم وابهذا الحـال...لا تخلوني
يعم چـاتلني الضمه...او نار گلبي مضرمه
وجمر تجـدح عيناي...يا ضوه اعيوني
* * *
ناده يا سكنه ابورع دخذي يالتردين...ماي من عيني
والله لو بيدي تگع رخصه من حسين...چان شفتيني
ما يهم عمچ فزع وأگلب للمصوبين...بس تحشميني
واليهمون الكـون...ما يهموني
هالحرم ومخيمي...او كربلا والعلگمي
تدخل ابسور احماي...يا ضوه اعيوني
* * *
زينب اوسكنه اوگمر هاشم ابحالات...من مصيبتها
من المخيم ظهر صوت والحسرات...تشب جمرتها
إمن الظمه چبدي انفطر مات طفلي مات...علت صيحتها
إمحيره بيّه اوبيه...لا تخلوني
ماي اريـد الهالطفل...اوخل دليلي يشتعل
واينشف ابجسمي المـاي...يا ضوه اعيوني
* * *
حنت اگلوب الوفه واخذته من امه...زينب الكبره
وابحنان اوعاطفه اتحبه اوتشمه...والكفل أمره
شهر بيده مرهفه والعَلم زمّه...ومن لكـد مهره
صـاح يختي ابمسراي...لو تفگدوني
وانتي يا بـت فاطمه...بالعيال اموزمه
اوسايريها ابمسراي...يا ضوه اعيوني
* * *
إرشد إرشد نيتك أوفي وعـدك روح...وإخذ ماضيها
والعيال إبغيبتك من نمير الروح...ماي أسجيها
والتضل ابذمتك للإخو مسموح...اخته توفيها
إواصبر اعلـه المقسوم...والصبر عوني
وصبري يرعالك حرم...جهدي يوفيك ذمم
اوما يگـصر مسعاي...يا ضوه اعيوني
* * *
