يا گمر هاشم يراعـي المرجله...گوم ردنه يالجبتنه إلكربله
* * *
يعباس إمن المدينه إلنينوه...عالمسير حسين حين إللي نوه
وزّمك بالحـرم وإنطاك إللوه...والضعن شخصك يمهيوب إكفله
* * *
يعباس إنته الموزّم والچفيل...بالفواطم يا شبل حـامي الدخيل
لون محمل من محاملها يميل...تلفي مسرع يا نفل وإتعدّله
* * *
يعباس ولو طفـل من ألأطفال...إمن المحامل يگع يا فحل الرجال
إتشيله بين إيديك تبذلّه الدلال...تبسم إوجهه إو ترده المحمله
* * *
وحين حـط حسين بالطف الخيم...إتوزّمت بالزمل يا بحر الشيم
الجود بمتونك إبيمناك العلم...چنت يا شبل الضياغم شايله
* * *
إتوزّمت بالنزل من دون العمام...ويزهر إبنورك يمصباح الظلام
إو سدة إسكندر چنت دون الخيام...وهيبتك چانت عليّه إمظلله
* * *
خان ينه الدهر ألأگشر والفلك...ولُمن من ظهر المطهّم جندلك
يا حليف السيف يالشخصك ملك...كل شجاعـه إلچانت إبعقد الوله
* * *
يعباس إعليك حاتفني الگدر...إو بالفواطم خان يا عزها الدهر
ريت عينك تنظر الحرب إو صخر...حين هجمت عالمخيم صايله
* * *
يعباس الخيل من غارت الخيل...وإنته عالغبره يبو فاضل چتبل
ثگب لعيـالك بچه إو حن إو عويل...إو فرت إمن الخوف بفجوج الفله
* * *
يا گمر هاشـم إو ما تگعد تشوف...إشحـال زينب والفواطم بالطفوف
بلا ستر لا چن سترهن بالچفوف...صار وإدموع البيابي هامله
* * *
يعباس إنهض يراعي المفخره...شوف أخوك حسين مرمي إعله الثره
إنسحگ صدره والشمر حز منحره...وجثته إبحد المواضي إمّثله
* * *
يعباس إشبول هاشم وألأنصار...چتل راحـت والخيم شبت بنار
لا تخليني غريبه إبهالديار...للوطن دگعد إو رِد العايله
* * *
يعباس إدريك ما تحمل إعتاب...لاچن من العطش لب إحشـاي ذاب
وألأمر وأمضه وأشد وأعظم مصاب...يهد حيلي إمصابك من أتمثّله
* * *
يعباس إمودّع ألله الضعن شـال...گلّطو هزل الرچايب للعيال
چتّفوهن يا وليهن بالحبال...والعليل إمگيدينه إبسلسله
* * *