هوسات
«تجليبه»
ماني إختك وأطلبك يا عجيد الـراي...وأريد العهد منك يالگلت بحماي
منته إللت گومي إلكربله وياي
والمحمل بيـدك شديته...وبكل مجهودك باريته
* * *
ماني الگلت عندي وبعد أگول إلنوب...وأنه غير الوفه ميلوگ إلي كل ثوب
أنه العباس وأگطع للمنايه إدروب
والساع إلزودي إتشوفينه...يا زينب وإنتي إتعرفينه
* * *
ماني إختك وطلبك چلمة الخـوّه...وأخبرك بالعطش بعيالك إشسوه
هاك إخذ الطفل عطشان يتلوه
والجـودك تتربه إعيونه...متدارچ وإتغير لونه
* * *
عد عيناچ شنهو الماي أجيب الماي...من گلب السمه وأسجي البگه إبرجواي
لاچن كون أخبط إدماي وي الماي
وشلون المـاي إتشربينه...والكافل خدرچ تنسينه
* * *
ماني إختك وعلمي علم داحـي البوب...يبو فاضل وأنه أدري بالذي مكتوب
لاچن من أشوف الطفل يمي إيلوب
أنخاك وگلبي إيحاچيني...باليجره إعليك إيدليني
* * *
هاچ إخذي يزينب هذا ماي العين...وإسجي الطفل منه وبخّي گلب حسين
بلا تعليم منتي العالمه وتدرين
للباري إعهود إشمنطينه...والواجب كون إتأدينه
* * *
ماني إختك وأأدي الفـرض من بعداك...وأتكفل حريم السدرت بحماك
ساعه وينگطع گلبي مثل يمناك
وإسهام إفراگك تعميني...ما وچد دربي إتخليني
* * *
