من غسل جسم الحسين ؟
«موشح»
جـد ينـاعي الكربلا او ناديها...إشجره ابجسم حسين من ظل بيها
* * *
جـد يناعي اومن تصل طف كربله...ناشد اعله حسين منهو الغسله
(او شوف سهم البيه صابه حرمله...بعده ماضي ابچبدته اوماضيها)
* * *
يبو اليمه اوهاي زينب والأيتام...ردَّت اتجدد عهدها يضرغام
گـوم شوف اشصابها ابديرة الشام...امن العده او ثوب الحزن چاسيها
* * *
عوِّدت زينب او تصرخ ياهلي...امتونها اتولمت من ضرب العصي
من عگب دار النزل بيها الوحي...بالخرايب چانو إمنزليها
* * *
او نادي يحسين اودمع عينك يهل...بالمعاره مرمي لاچنك عدل
فوق صدرك چى يذبحون الطفل...وانته حي او ناظرك يربيها
* * *
يمن بسمك نـار نمرود انطفت...اشلون بمخيمك نيران إسعرت
اشلون يا ريف اليتامه اتيتمت...اطفالك اوگوم العده إمسليها
* * *
آ يضيعة زينب اوهظم العيال...عگب ذاك الخـدر والعز والدلال
إميسره اوبرگابها امعگّدَه الحبال...مشت لاچن عالهزل سابيها
* * *
لبن مرجـانه انهدت مسبيه...والسبي سار الظهر حاديه
اوعين زينب عالمعـاره إربيه...اتحشم إو لا هاشمي إيحييها
* * *
اوگطعت أفچوچ الفله ابظهـر الهجن...والعليل ابرگبته الطوگ او يحن
او يلچم إجروح الفواطم من يون...والأيتام الونـّته اتنابيها
* * *
جد يناعي اوحين توصل نينوه...مر على الشاطي اوناشد عاللوه
وين طاح او وين ابو فاضل هوه...اچفوفه بلچن عالنهر تلگيها
* * *
لولگيت حسين مدفون ابگبر...طيح فوگ الگبر وإلطم عالصدر
على امصابه واجذب الحسره جمر...واظهر ابونتك لا تخفيها
* * *
او نادي يا ضنوة علي اوروح البتول...يمن صـدرك هيبة اعلوم الرسول
بالحوافر چى يرضنه الخيول...او بالمواضي جثتك اموزعيها
* * *
اشلون تبگه امعفر ابفيض الدمه...وانته گطب الفلك وامقرّ السمه
اشلون طفلك فطر إحشاه الظمه...او مهجته ابسم السهم مرويها
* * *
