عقيلة الهاشميين
«ميمر مذيل»
زينب الكبره...يالتناشد عنها
من فاطمه نـالت شرف عصمتها...يالتناشد عنها
* * *
هاي الجليله الفاضله المحجوبه...بستار الجلاله
هاي الأصيله إلبالشرف منسوبه...لشراف الرساله
هاي العظيمه الساميه المهيوبه...بسيوف العـداله
هـاي العفيفه...يالتناشد عنها
وإرماح هاشم حد خدر عفتها...يالتناشد عنها
* * *
عن خدر هاشم إخذ تاريخ الزود...وإعتبر وإتصور
تلگه الخدر بسيوف هاشم مرصود...بالرماح إمصگر
وإعله الخدر نسج الشرف ظل ممدود...والنسج من حيدر
إحمد شرفها...يالتناشد عنها
وإشكر إلهمه إلبالشرف بذلتها...يالتناشد عنها
* * *
إو حين الولاده إنعرضت إعله الكـرار...رادو يسميها
ودع إسمها للرسول إبأسرار...إو من تبصر بيها
جبريل نص إبهالأسم عالمختار...من قِبَل باريها
سمّوها زينب...يالتناشد عنها
وإبهالأسم روح القـدس سمتها...يالتناشد عنها
* * *
مولدها بيت إلبي خدم جبرائيل...إو فـاز إبهالخدامه
ربّاها حجر الينذكر بالتنزيل...إبآيات الكرامه
إو غذاها ثدي الينوصف بالتأويل...ينبوع ألإمامه
بنت الزچيه...يالتناشد عنها
آية العصمه إمن الدنس زكتها...يالتناشد عنها
* * *
إنشدني إعله زينب لو فكرتك چلّت...من ثمـر معناها
عالمه إبلا تعليم زينب نشأت...بالعلم غذاها
ثدي العلوم إو بالعلوم إتربت...واعلم رباها
قدس ربـاها...يالتناشد عنها
إحجور المعالي الطاهره ربتها...يالتناشد عنها
* * *
نالت من الهادي محاسن علمه...إو من علي والدها
معنه الفصاحه ومن الزهره العصمه...والوحي شاهدها
وإستأثرت من الحسن سر علمه...إو عالدهر ساعدها
بالنصره نـالت...يالتناشد عنها
صبـر الحسين إو بالصبر نصرتها...يالتناشد عنها
* * *
والگبر جدها من تزوره إبكل حين...حيدر إيوديها
والحسن عن يمناها واليسره حسين...يمشي وإيباريها
وإخلافها العباس شابح بالعين...لخته ويحييها
إو تمشي إبجـلاله...يالتناشد عنها
إو ثـوب الجلاله لبسته إمن إخوتها...يالتناشد عنها
* * *
وإبليل گبر الهادي تتشرف بيه...بشراف الغوالب
والدها يسرع للسراج إو يخفيه...تدرون إشيراقب
لخيال زينب گصده لا تنظر ليه...عين إمن ألأجانب
بشـراف أهلها...يالتناشد عنها
عاشت عزيزه إو ما تذل عزتها...يالتناشد عنها
* * *
إومن وافه حيدر سهم المگدر صاح...يرجال الحميه
زينب وديعتكم إو ظلت ترتاح...إو منطوره الثنيه
وحسين من شد ضعنه من ألأبطاح...لرض الغاضريه
إلزينب تعنـه...يالتناشد عنها
عباس وإتكفل خدر حرمتها...يالتناشد عنها
* * *
عباس لخته إبشيمته إتكفلها...يالتناشد عنه
إو گلط الناگه إو بيده شد محملها...وإرتجز وإتچنه
وإمدلـله إو حگ الولي إيدللها...ويعمل إشتتمنه
بالهيبه گـبعت...يالتناشد عنها
سارت إو عباس الحـده إبناگتها...يالتناشد عنها
* * *
إتغربت عن الوطن لاچن زينب...لالا مو غريبه
وإبزود أهلها إو عز حماها إمرتب...بالأهل ترتيبه
من گال زينب تنسبي إو تتسلب...عگب ذيچ الهيبه
بالغـاضريه...يالتناشد عنها
فگدت حماها إو حست إبغربتها...يالتناشد عنها
* * *
