ألم سبي حرم...ومكاني خالي بالخيم
القدر عنك حجبني ...اسنين بعدك
رحت الك زرت...زياره الناحيه وشفت
بكثر ناس التحبني...اجروح عندك

آنه الحُجّه يجد .. اجيت اعله الوعد...كلامي
عله ذاك الضعن .. ونزوحه امن الوطن...سلامي
بني عمرو العله .. خذتهم كربله...عمامي
انسلب كلشي الك .. وقريت بمقتلك...اسامي
وهب الك وهب...زهير ومسلم الذهب
يمن تحسبهم انته .. شلون ولدك
زلم صدك زلم...حبيب وعابس ونعم
وكع وانته حضنته .. اجروح عندك

الهي ايساعدك .. طلعت لوحدك...تحاور
يجد ضاع البخَت .. وعليك اتجمعت...عشاير
شعمل بيك الحجر .. عظم راسك كسر...وتكابر
الشفاه امفطره .. العيون امحومره...وعساكر
شمس ظهر ضمه...واكول شصار بفاطمه
اجت تمسح بديهه .. اتراب خدك
شعجب سكت علي...وتنادي بويه احضر الي
النجف ندبت عليهه .. اجروح عندك

شكثر غايب عشت .. وعليك شكد متت...يجدي
قميصك البسه .. وسهم اتلمسه...اعله جبدي
الشمر حز النحر .. ويوجهك عالنهر...تحدي
الكمر ذاك الوكت .. يناديني اسمعت...يمهدي
كتب الي اثر...دعاء الندبه عالنهر
اليه تصيح روحه .. انريد وعدك
تجي الك علم...وتروح من الله للخيم
حسبت بكد جروحه .. اجروح عندك

اخذ روحي الالم .. اعله فسطاط الخيم...هضيمه
شفت مهرك بچه .. وفقط كلمه حچه...ظليمه
هُنا طايح طفل .. هُنا سلبو حجل...يتيمه
سكينه اويه الغرب .. رقيه تنضرب...جريمه
صعب تره مره...تطيح وتبقه حايره
العيون اعليهه كلهه .. وچان ردك
كمت طحت كمت...بلا راس وبعد طحت
إنه ضامي تكلهه .. اجروح عندك

بعمر نوح النبي .. عشت عمر السبي...وعبرته
منو سامع خبر .. سوالف من نحر...سمعته
الرمح عنده گلب .. بچه اكبال الغرب...شنو انته
قبل صلة الرحم .. اكو صلة الخيم...عله اخته
بقه تره كمر...برماحه حتى لو نحر
يضوي اعله الحياره .. بليل بُعدك
(الى متى اضل...انادي عباس الكفل )
جوابه واعتذاره .. اجروح عندك

الحزّن صلّه قصر .. بوسط ذاك القصر...ضعينه
المصايب للزلم .. الصعب من ينشتم...علينه
يزيد بفرحته .. يبشر جدّته...بسبينه
عدلناهه ابدر .. ومحمد ينكسر...بحسينه
صحت تُشل عسن...يزيد اديك بكل زمن
تذلنه بهالقساوه .. تريد قصدك
الحصل نصر فتح...قريب وداعة الذبح
كلام الحره داوه .. اجروح عندك

بعد كل هالامر .. العليله تنتظر...بعدهه
عطرهه باليسر .. ويموت بلا عطر...وردهه
خذتني الفاجعه .. عله ام الاربعه...ونشدهه
تنادي بخدمتك .. وتكلك فدوتك...ولدهه
إنه طحت دمه...الى العليله امن السمه
تره القاروره عيني .. وعين جدّك
بعد الم رحت...لسان ابن حذلم صرت
ولكيت بكد سنيني .. اجروح عندك

ألف عام الدرب .. ودمع عيني يصب...دمايه
بظهوري للمله .. اسولف كربله...حكايه
الي عالمشرعه .. جفوف امكطعه...اعله رايه
اجي واذبح نذر .. اثنعش ناگة يسر...ورايه
ارد ارد وعد...وغيابي ينتهي يجد
وتشوف الناس بيه .. شلون فكدك
قسم قسم قسم...اجيهم جية العلم
وبعد ما تبقى بيه .. اجروح عندك