سهرانه عيني...بدمعة حنيني

اعيوني السهر ذوبها وادموع الحنين اشهود...واعله الصبر دلاني فقدك يا أعز مفقود
عايش حياة الإنتظار وندبة الموعود...يمته الوعد وبطلعتك تكشف ليالي السود
صابر يقيني...بدمعة حنيني

جم مره جم ويه الدمع وديت إلك مرسال...يالأدره مني بحالتي وبمدمعي الهمال
وبرقعة الحاجه إلك ما أشتكي امن الحال...ما عندي شكوه بس غيابك يالغيابك طال
تمضي سنيني...بدمعة حنيني

يمضي الزمن مستعجل وبيه السنين اتروح...يالمهدي وإقبالي العمر باب الأجل مفتوح
كل ليله من عمري بجرح تحسبها هاي الروح...تدري الجرح ما يعرفه بس اللي عنده اجروح
تسمع ونيني...بدمعة حنيني

رجوة عُمُر ما فارقت بالي وتعيش اوياي...نظره الأكحل بيها يبن العسكري عيناي
الله يعجل بالفرج صبح ومسه دعواي...بس حته أشوفك وأقضي نحبي بخدمتك مولاي
وش يقضي ديني...بدمعة حنيني

ظلت بعد رجوه إلي لو غمضت هالعين...لو موتي حان ومن شمس فجرك حرمني البين
للرجعه ادعي الخالق بجاه الغريب حسين ...يخرجني من قبري وألبي دعوة الداعين
سيفي بيميني...بدمعة حنيني